पुणे : हॅलो महाराष्ट्र – पुण्यामध्ये एक धक्कादायक घटना घडली आहे. यामध्ये कचरा वाहतूक करणाऱ्या ट्रकला ओव्हरटेक करण्याच्या नादात एका तरुणीला आपला जीव गमवावा लागला आहे. कश्मिरा प्रशांत भंडारी असे मृत्युमुखी पडलेल्या 20 वर्षीय तरुणीचे नाव आहे, ती पुण्यातील नामवंत फटाके व्यापारी प्रशांत भंडारी यांची मुलगी होती. मृत कश्मिरा ही एक गुणवान बॅडमिंटनपटू होती. तिने अनेकदा राज्यस्तरीय बॅडमिंटन स्पर्धेत सहभाग घेतला होता. तिचा या अपघातात दुर्दैवी मृत्यू झाल्याने संपूर्ण परिसरात हळहळ व्यक्त केली जात आहे.
कसा घडला नेमका अपघात ?
मृत कश्मिरा सुजय गार्डनहून काही कामानिमित्त लक्ष्मीनारायण चौकाच्या दिशेने जात होती. यावेळी तिच्या समोर एक कचऱ्याचा ट्रक होता. यावेळी कश्मिराने डाव्या बाजूने ट्रकला ओव्हरटेक करण्याचा प्रयत्न केला. पण डाव्या बाजूला आधीच एक चारचाकी गाडी पार्क करण्यात आली होती. त्यामुळे तिला डाव्या बाजूने ट्रकला ओव्हरटेक करता आले नाही त्यामुळे तिने स्कूटरचे अचानक ब्रेक दाबले.
तिने अचानक ब्रेक लावल्याने स्कूटर घसरली आणि कश्मिरा थेट धावत्या ट्रकखाली पडली. यानंतर काही क्षणात ट्रकने 20 वर्षीय कश्मिराला चिरडले. या घटनेची माहिती पोलिसांना मिळताच पोलिसांनी अपघाती मृत्यूची नोंद केली. या दुर्घटनेनंतर ट्रकचालक घटनास्थळावरून फरार झाला आहे. पोलीस सध्या या फरार ट्रक चालकाचा शोध घेत आहेत.