नाशिक : हॅलो महाराष्ट्र – नाशिक-पेठ महामार्गावर ट्रक आणि पिकअप व्हॅनमध्ये एक भीषण अपघात झाला आहे. या अपघातात तीन जण जागीच ठार झाले आहेत. कमलेश मोरे, संतोष लांडे, हेमंत मोरे अशी या अपघातात मृत पावलेल्या तरुणांची नावे आहेत. हे तिन्ही तरुण चाचडगावचे रहिवाशी होते. या घटनेमुळे संपूर्ण गावावर शोककळा पसरली आहे.
कशा प्रकारे झाला अपघात
पेठ येथून एक आयशर ट्रक नाशिकच्या दिशेने जात होता. तर चाचडगावहून एक पिकअप व्हॅन पेठच्या दिशेने येत होती. यावेळी दोन्ही वाहनांची भीषण टक्कर होऊन मोठा अपघात झाला. या अपघातात पिकअपमधील संतोष हिरामण लांडे, कमलेश सुखदेव मोरे, आणि हेमंत रघुनाथ मोरे या चाचडगाव येथील तिन्ही तरुणांचा जागीच मृत्यू झाला. तर लखन भगवान गांगोडे आणि रवींद्र वामन पोटींदे हे दोघेजण या अपघातात गंभीर जखमी झाले असून त्यांच्यावर उपचार सुरु आहे.
रस्त्यावर रक्ताचा सडा
आयशर ट्रक आणि पिकअप व्हॅनमध्ये झालेली धडक इतकी भयंकर होती की, यात पिकअप व्हॅनचा जागेवरच चुराडा झाला. या अपघातामुळे रस्त्यावर रक्ताचा सडा पडला होता. या भीषण अपघाताची माहिती मिळताच चाचडगावच्या गावकऱ्यांनी घटनास्थळी धाव घेतली. या अपघाताची माहिती समजताच पोलीससुद्धा घटनास्थळी दाखल झाले. यानंतर त्यांनी रस्त्यावरील मृतदेह, अपघातग्रस्त वाहने हटवली. या अपघातामुळे चाचडगाववर मोठी शोककळा पसरली आहे. पोलीस या अपघाताचा पुढील तपास करत आहेत.