अक्षय कुमार धावला ज्युनिअर आर्टिस्टच्या मदतीला; १५०० जणांच्या खात्यात टाकले पैसे

मुंबई । कोरोनाच्या संसर्गामुळं मुंबईतील चित्रपट उद्योग ठप्प पडला आहे. सिनेसृष्टीत चित्रीकरण बंद असल्यानं अनेक जणांवर उपासमारीचे वेळ आली आहे. कोरोनाचा प्रादुर्भाव झाल्यानंतर, सर्वजण आपल्या परिने काही ना काही मदत करण्याचा प्रयत्न करीत आहेत. मदत करण्यासाठी बॉलिवूड सेलिब्रिटी आघाडीवर आहेत. अशा वेळी पुन्हा एकदा खिलाडी अक्षय कुमार रोजंदारीवर काम करणारे कामगार आणि ज्युनिअर आर्टिस्ट यांच्या मदतीला धावून आला आहे.

अक्षयनं तब्बल १५०० ज्युनिअर आर्टिस्ट यांच्या बॅंक अकाऊंटमध्ये ३ हजार रुपये जमा केले आहे. सिने आणि टीव्ही आर्टिस्ट असोसिएशनचे सीनिअर ज्वॉइंट सेक्रेटरी व अभिनेते अमित बहल यांनी यासंदर्भात माहिती दिली आहे.चित्रपट आणि मालिकांचं चित्रीकरण बंद असल्यामुळं कामगार आणि ज्युनिअर आर्टिस्ट यांच्यासमोर आर्थिक संकट उभं राहिलं आहे.

त्यामुळं यांच्या मदतीसाठी सिनेसृष्टीतील अनेक मंडळी पुढं आले आहेत. याच संदर्भात अक्षयला कळताच त्यानं तत्काळ मदत जाहीर केली. सिने आणि टीव्ही आर्टिस्ट असोसिएशननं अक्षयला १५०० ज्युनिअर आर्टिस्टची यादी पाठवली. त्यानंतर त्यानं लगेचच या आर्टिस्टच्या अकाऊंटवर प्रत्येकी ३००० रुपये पाठवले. कोरोना संकटात याआधीही अक्षयनं पंतप्रधान सहाय्यता निधीसाठी २५ कोटी त्यानंतर मुंबई पालिकेला ३ तीन कोटींची मदत केली. अक्षय इतक्यावरच थांबला नाही. तर त्यानं पोलिस आणि वैद्यकीय कर्मचाऱ्यांना देखील थेट मदत केली आहे.

ब्रेकिंग बातम्या मोबाईलवर मिळवण्यासाठी आम्हाला 7972630753 या नंबरला WhatsApp करा आणि लिहा “Hello News.”