मुंबई । बॉलिवूड अभिनेता सोनू सूद गेल्या काही दिवसांपासून चर्चेत आहे. कोरोनाच्या पार्श्वभूमीवर देशभरात अचानक लॉकडाऊन करण्यात आलं. यामुळे असंख्य मजुरांची गैरसोय झाली. हाताचे काम गेले. उपासमारीची वेळ आली. घरी जाण्याचे रस्ते बंद झाले. अशा संकटाच्या परिस्थितीत सोनू सूद मजुरांच्या मदतीला धावून आला. सोनूने या मजुरांची अडचण ओळखत त्यांना बसने त्यांच्या गावी पाठवायला गेल्या काही दिवसापासून सुरुवात केली आहे. सोनूला दिवसातून हजारो मजुरांचे फोन आणि मेसेज येत आहे. सोनू त्याला जमेल तसं या मजुरांची त्यांच्या घरी जाण्याची व्यवस्था करत आहे. लॉकडाऊनच्या या काळात मजुरांसाठी सोनू सूद ‘मसीहा’ ठरला आहे.
या मदतीमुळे सोनू सोशल मीडियावर ट्रेंड होऊ लागला. खऱ्या आयुष्यातही लोकं त्याला खऱ्या हिरोचा दर्जा देऊ लागलेत. मात्र जो सोनू सूद मजुरांकरता लाखो रुपये खर्च करत आहे. तो जेव्हा मुंबईत आला तेव्हा त्याच्याकडे अवघे साडे पाच रुपये होते. एका मुलाखतीत सोनूने सांगितलं की, आपल्या करिअरची सुरूवात दिल्लीत मॉडेलिंग करून केली. मॉडेलिंगमधून काही पैसे जमा करायचे आणि मुंबईत स्ट्रगल करण्यासाठी यायचं. दिल्लीत दीड वर्ष अनेक शोमध्ये काम करून साडे पाच हजार जमवणं शक्य झालं होते. एवढ्या पैशातून एक महिना आपण काढू शकतो असं सोनू सूदला वाटल्यानंतर त्याने मुंबई गाठली. पण त्याचे हे पैसे अवघ्या ५-६ दिवसांतच संपले.
त्याचवेळी त्याला पहिला ब्रेक एका जाहिरातीकरता मिळाला. या कामाचे त्याला प्रत्येक दिवसाचे २००० रुपये मिळणार होते. सोनू सूदला वाटलं की या जाहिरातीतून मला फिल्म सिटीत प्रवेश पण मिळेल आणि लोकंसुद्धा मला ओळखतील. पण तिथे गेल्यावर त्याला लक्षात आलं की आणखी काही जण तेथे उपस्थित होते. त्या जाहिरातीमध्ये सोनू सूद मागे ड्रम वाजवत होता पण जाहिरात प्रदर्शित झाल्यावर तो त्यात दिसला देखील नाही. सोनू सूद मुंबईत आला तेव्हा त्याला वाटत होतं की, लोकांनी आपली मदत करावी. पण त्याला कुणीही अभिनेताही भेटत नव्हता. कुणीही भेटलं तरी तू अभिनेता बनायला आलास? असा उपरोधक प्रश्न विचारत असे. पण आता सोनू सूदला कुणी भेटायला आलं तर तो त्याला मोकळेपणाने भेटतो. तो कुणालाही निराश करत नाही.
ब्रेकिंग बातम्या मोबाईलवर मिळवण्यासाठी आम्हाला 7972630753 या नंबरला WhatsApp करा आणि लिहा “Hello News.”