चंद्रपूर : हॅलो महाराष्ट्र – गेल्या काही महिन्यांपासून जन्मदात्यांनीच आपल्या पोटच्या मुलांना संपवल्याच्या घटनांमध्ये मोठ्या प्रमाणात वाढ झाली आहे. चंद्रपूर जिल्ह्यातील राजुरा तालुक्यातील विरुर पोलिस ठाण्याच्या हद्दीत अशीच एक धक्कादायक घटना घडली आहे. मृत तरुणी तेलंगणाच्या विजयवाडा जिल्ह्यातील कोंडापल्ली येथील रहिवासी होती. हि तरुणी आपल्या पतीपासून विभक्त झाल्यानंतर गर्भवती झाल्याने आईला संताप आला. त्यामुळे तिने आपल्या पोटच्या लेकीच्या हत्येचा कट रचला. आरोपी महिलेच्या नातात्यातील दाम्पत्याने पीडितेला विहिरीत ढकलून तिचा खून केला आहे. या प्रकरणी तीन आरोपींना अटक करण्यात आली आहे.
काय आहे प्रकरण?
चंद्रपूर जिल्ह्यात आपल्या आईने सुपारी देऊन पोटच्या मुलीचा खून केला आहे. 18 फेब्रुवारी रोजी राजुरा तालुक्यातील कविटपेठ या ठिकाणी एका विहिरीत अज्ञात महिलेचा मृतदेह आढळून आला होता. या महिलेची ओळख पटविण्यासाठी विरुर पोलिसांनी तेलंगणा आणि आंध्र प्रदेशमध्ये या महिलेचे फोटो पाठवले. त्यावरुन मृत महिला तेलंगणाच्या विजयवाडा जिल्ह्यातील कोंडापल्ली येथील रहिवासी असल्याचे समजले.
मुलीच्या चारित्र्याबाबत आईला शंका
पतीपासून विभक्त राहणारी संबंधित महिला गर्भवती राहिल्याने तिच्या चारित्र्याबाबत आईच्या मनात शंका निर्माण झाली. त्यामुळे आईने गर्भपात करण्याच्या बहाण्याने मुलीला राजुरा तालुक्यातील मुंडीगेट येथील नातेवाईकाकडे पाठवले.
तीस हजारांची नातेवाईकांना सुपारी
मुंडीगेट येथील आरोपी महिलेचे नातेवाईक सीन्नू आणि त्याची पत्नी शारदा यांनी तीस हजारांसाठी विहिरीत ढकलून या महिलेचा खून केला. मात्र पोलिसांनी कसून तपास करून या खुनाचा उलघडा केला. महिलेची आई लचमी, नातेवाईक सीन्नू आणि शारदा यांना या प्रकरणी अटक करण्यात आली आहे. तसेच पोलीस या घटनेचा पुढील तपास करत आहेत.