चिंताजनक! मागील २४ तासांत ७५ पोलीस कोरोनाबाधित

मुंबई । राज्यावरील कोरोना संकट दिवसेंदिवस अधिकच गहिरं होत चाललं आहे. आरोग्य यंत्रणेबरोबरच महाराष्ट्र पोलीस दलाला या विषाणूनं विळखा घातला आहे. गेल्या २४ तासांत राज्यातील ७५ पोलीस कर्मचारी करोनाबाधित असल्याचं निदान झालं आहे. त्यामुळं महाराष्ट्र पोलीस दलातील करोनाबाधित कर्मचारी-अधिकाऱ्यांची संख्या १९६४ झाली आहे. तर पोलीस दलातील मृत्यूची संख्या २०वर पोहोचली आहे. कोरोनाबाधित पोलीस कर्मचाऱ्यांपैकी ८४९ जणांनी कोरोनावर मात केली आहे. तर १०९५ पोलिसांवर विविध रुग्णालयांत उपचार सुरू आहेत, अशी माहिती राज्य पोलीस दलाकडून देण्यात आली.

कोरोनाबाधितांमध्ये राज्यातील २२३ पोलीस अधिकारी आहेत. तर १७४१ कर्मचारी आहेत. अद्याप १५५ अधिकारी आणि ९४० पोलीस कर्मचाऱ्यांवर उपचार सुरू आहेत. ६७ पोलीस अधिकारी हे या आजारातून बरे झाले आहेत. ७८२ पोलीस कर्मचारी कोरोनामुक्त झाले आहेत. तर आतापर्यंत एका अधिकाऱ्यासह १९ पोलीस कर्मचाऱ्यांचा करोनाच्या संसर्गाने मृत्यू झाला आहे. त्यात मुंबई पोलीस दलातील मृत्यूची संख्या सर्वाधिक आहे.

ब्रेकिंग बातम्या मोबाईलवर मिळवण्यासाठी आम्हाला 7972630753 या नंबरला WhatsApp करा आणि लिहा “Hello News.”