हॅलो महाराष्ट्र ऑनलाईन । राष्ट्रवादी काँग्रेस नेते नवाब मलिकी यांना काल ईडीने अटक केल्यानंतर राजकीय वातावरण चांगलेच तापले आहे. दरम्यान भाजप व राष्ट्रवादी काँग्रेसमध्ये आरोपप्रत्यारोप केले गले. भाजप नेते देवेंद्र फडणवीस यांनीही मलिक यांच्या अटकेवरून निशाणा साधला आहे. “अंडरवर्ल्ड डॉन दाऊद इब्राहिमशी व्यवहार करणाऱ्या मंत्र्यासोबत अख्खे सरकार उभे राहत असल्याचा संदेश देशभरात जाईल, अशी टीका फडणवीस यांनी केली.
देवेंद्र फडणवीस यांनी माध्यमांशी संवाद साधला. यावेळी ते म्हणाले की, राज्यातील राजकारणात सध्या अतिशय चुकीचा पायंडा पाडला जात आहे. वास्तविक पाहता मलिक यांना कोणत्याही राजकीय गुन्ह्यात अटक झालेली नाही. तर टेरर फंडिंग संबंधित गुन्ह्यात त्यांना अटक करण्यात आली आहे.
मलिक यांना ईडीने मनी लॉन्ड्रिंग प्रकरणामध्ये अटक केली आहे. अशा परिस्थितीत एक मंत्री राजीनामा देणार नसतील आणि सरकार म्हणत असेल की आम्ही त्यांचा राजीनामा घेणार नाही, तर एक संविधानिक परिस्थिती या ठिकाणी तयार होते. पण मी एवढंच सांगेन की देशात याचा चुकीचा संदेश जाईल. दाऊदसोबत व्यवहार करणाऱ्याच्या पाठीशी सरकार उभं राहत असल्याचा संदेश यातून जाईल.