हॅलो महाराष्ट्र ऑनलाइन | राष्ट्रवादी काँग्रेसचे नेते आणि सामाजिक न्यायमूर्ती धनंजय मुंडे यांच्या पत्नी करुणा मुंडे यांनी नव्या पक्षाची घोषणा केली होती. आता तर आपल्या पक्षाला धनंजय मुंडे यांचा पाठिंबा असल्याचा खळबळजनक दावा त्यांनी केला आहे. तसेच आपल्या मागे अनेक अदृश्य हात असल्याचे म्हणत त्यांनी खळबळ उडवून दिली आहे.
करुणा मुंडे या अहमदनगर येथून संपूर्ण महाराष्ट्राचा दौरा करत आहेत. त्या पार्श्वभूमीवर पत्रकारांशी संवाद साधताना त्या म्हणाल्या, मी काही करु शकणार नाही असे वाटणाऱ्या पती धनंजय मुंडे यांचा आमच्या नव्या पक्षाला पाठिंबा व अभिमान असल्याचा दावा त्यांनी केला. एक अदृष्य शक्ती आपल्याकडून हे कार्य करवून घेत असून, महिला व सामाजिक भान असलेल्या कार्यकर्त्यांनी संपर्क साधण्याचे आवाहन त्यांनी केले.
सध्याच्या राजकारणात नैतिकता उरली नाही. पैसा आणि स्वार्थासाठी सत्तेचा दुरुपयोग करून सर्वसामान्य जनतेच्या प्रश्‍नाकडे दुर्लक्ष करणारी ही प्रवृत्ती वाढली आहे. ती दूर करण्यासाठी आपण नव्या पक्षाची स्थापना करत आहोत. भ्रष्टाचार आणि अत्याचारमुक्त महाराष्ट्र आपल्याला घडवायचा आहे असेही करुणा मुंडे यांनी म्हंटल.