नागपूर | भारतातील गणेशोत्सव पाहण्यासाठी आलेल्या विदेशी पर्यटक तरुणीला नागपूरातील एका माॅलमधे अश्लील चाळ्याला सामोरे जावे लागले आहे. नागपूर येथील इटर्निटी माॅलमधील एका कपड्याच्या दुकानातील ट्रायल रुममधे हा प्रकार घडला आहे. पिडीत तरुणी २२ वर्षांची असून मुळची थायलंडची राहणारी आहे. तरुणीच्या मित्राने पोलीसांत तक्रार केल्यानंतर संबंधीत आरोपींवर पोलीसांनी कारवाई केली आहे.
हाती आलेल्या माहीतीनुसार, घटनेतील तक्रारदार मित्र एकवर्षापूर्वी कामानिमित्त थायलंडला गेला असता त्याची पिडीत तरुणीशी ओळख झाली होती. या तरुणीने महाराष्ट्रातील गणेशेत्सवाबद्दल इंटरनेटवर बरेच काही वाचले होते. तिला हा गणेशोत्सव पाहायचा होता. काही दिवसांपूर्वी ती नागपूरला आली. पिडीत तरुणी आणि तिचा मित्र रविवारी सायंकाळी कपडे खरेदीसाठी नागपूरातील इटर्निटी माॅलमधे गेले होते. यावेळी एफबीबी शोरूममधे कपडे ट्राय करुन पाहण्यासाठी पिडीत तरुणी ट्रायल रुममधे गेली. परंतू काही अडचण आल्यामुळे तिने तेथे कार्यरत असलेल्या जयशील प्रीतमसिंह परिहार (वय २३) याला आवाज दिला. मदतीचा बहाणा करुन जयशील सरळ ट्रायल रुम मधे घूसला आणि त्याने तरुणीशी अश्लील चाळे करण्यास सुरवात केली. जयशीलने अतिप्रसंग करण्याचा प्रयत्न केल्याने तरुणीने आरडाओरडा केला. यावेळी तरुणीचा मित्र आणि जवळपास असलेले लोक तिच्या मदतीसाठी धावून गेले.