क्षुल्लक कारणावरून वाद; झोपलेल्या पतीच्या तोंडावर पत्नीनं ओतलं उकळतं तेल

सागर । कामावरून उशिरा घरी आलेल्या पतीचे कोणत्या तरी कारणावरून पत्नीसोबत भांडण झाले. त्यानंतर झोपी गेलेल्या पतीच्या चेहऱ्यावर त्यांच्या पत्नीनं चक्क उकळते तेल ओतले. त्याच्यावर रुग्णालयात उपचार सुरू आहेत. मध्यप्रदेशातील सागर जिल्ह्यात ही घटना घडली आहे. या प्रकरणी पोलिसांनी आरोपी पत्नी शिवकुमारी अहिरवार हिच्याविरोधात गुन्हा दाखल केला आहे.

शिवकुमारी आणि पती अरविंद अहिरवार या दोघांचे लग्न चार वर्षांपूर्वी झाले आहे.अरविंद अहिरवार हा रोजंदारीचे काम करतो. नेहमीप्रमाणे तो कामावरून उशिरा घरी आला. त्यानंतर कोणत्या तरी क्षुल्लक कारणावरून त्याचा पत्नीशी वाद झाला. रात्री तो झोपला. झोपेत असताना पत्नी शिवकुमारी हिने त्याच्या चेहऱ्यावर उकळते तेल ओतले. यात तो होरपळला आहे. त्याला बुंदेलखंड मेडिकल कॉलेजात उपचारासाठी दाखल करण्यात आले आहे.

अरविंदच्या भावाने सर्व हकिकत सांगितली. पत्नीसोबत त्याची बाचाबाची झाली. त्यानंतर आई-वडिलांनी मध्यस्थी केली. त्यामुळे दोघेही शांत झाले. मात्र, भल्या पहाटे पती झोपेत असताना पत्नी शिवकुमारी हिने त्याच्या चेहऱ्यावर उकळते तेल ओतले. त्याच्या किंचाळ्या ऐकू आल्यानंतर आई-वडील खोलीत गेले. शेजाऱ्यांच्या मदतीने त्याला रुग्णालयात दाखल केले आहे. या कृत्यानंतर पत्नी घरीच असून, तिला या कृत्याचा आता पश्चाताप होत आहे. पती अरविंदच्या जबाबानंतर पोलिसांनी पत्नीविरोधात गुन्हा दाखल केला आहे.

ब्रेकिंग बातम्या मोबाईलवर मिळवण्यासाठी आम्हाला 7972630753 या नंबरला whatsapp करा आणि लिहा ‘Hello News’

You might also like