नवी मुंबईत सोसायटीच्या निवडणुकीमध्ये दोन गटांत तुंबळ हाणामारी

ताज्या मराठी बातम्यांसाठी आमचा ग्रुप जॉईन करा
WhatsApp Group Join Now
Google News Join Now

नवी मुंबई : हॅलो महाराष्ट्र – लवकरच राज्यातील विविध महानगरपालिकांच्या निवडणुका पार पडणार आहेत. या निवडणुकांसाठी सर्वच राजकीय पक्ष जोरदार तयारी करत आहेत. या निवडणुकीचे परिणाम आता स्थानिक सोसायटीच्या निवडणुकांमध्ये दिसत आहे. याचा प्रत्यय घणसोली या ठिकाणी आला आहे. या ठिकाणच्या एका सोसायटीच्या निवडणुकीत दोन गटांत तुंबळ हाणामारी झाली आहे. या हाणामारीचा व्हिडिओ सोशल मीडियावर मोठ्या प्रमाणात व्हायरल झाला आहे.

काय आहे प्रकरण ?
नवी मुंबईतील घणसोली परिसरातील माऊली कृपा या सोसायटीमध्ये संचालकपदाची निवडणूक पार पडत आहे. या निवडणुकीत परिवर्तन आणि उन्नत्ती पॅनल आमने सामने आहेत. सोसायटीतील निवडणुकीमुळे या ठिकाणी तणावाचे वातावरण आहे. या निवडणुकीदरम्यान सोसायटीमध्ये बाहेरून आलेल्या तरुणांनी सोसायटीमधील दिलीप चिकणे यांना बेदम मारहाण केली. या मारहाणीत दिलीप चिकणे गंभीर जखमी झाले असून त्यांच्यावर अतिदक्षता विभागात उपचार सुरू आहेत. ही मारहाण परिवर्तन पॅनलचे सौरभ शिंदे यांच्याकडून करण्यात येत असल्याचा आरोप उन्नत्ती पॅनलकडून करण्यात आला आहे. या प्रकरणी पोलिसांनी मारहाण करणाऱ्या कार्यकर्त्यांच्या विरोधात गुन्हा दाखल केला आहे.

हि जरी सोसायटीची निवडणूक असली तरी येत्या काळात होणाऱ्या नवी मुंबई मनपाच्या निवडणुका आणि त्यासोबतच या परिसरातील इमारतींचे पुनर्वसन यामुळे निवडणुकीला फार महत्त्व आले आहे. या निवडणुकीत भाजप आणि राष्ट्रवादी काँग्रेसचे कार्यकर्ते आमनेसामने आहेत. या ठिकाणी घरांच्या पुनर्विकासाचे काम सुरु झाले आहे. पुनर्विकासाचं काम हातून जाऊ नये यासाठी राजकीय पक्षाचे नेते कामाला लागले आहेत. परिवर्तन पॅनल हा राष्ट्रवादी काँग्रेसचा पॅनल मानला जातो तर उन्नत्ती पॅनल हा भाजपचा पॅनल आहे. याच निवडणुकीच्या अनुषंगाने परिवर्तन पॅनलकडून शुक्रवारी जेवणाचे आयोजन करण्यात आले होते. यावेळी दोन्ही गटांत सुरुवातीला बाचाबाची झाली आणि त्यानंतर या बाचाबाचीचं रुपांतर हाणामारीत झाले. या हाणामारीचा व्हिडिओ सोशल मीडियावर मोठ्या प्रमाणात व्हायरल होत आहे.

 

 

Leave a Comment