पुणे | घरात आईच्या स्वंयपाककामात मदत करणाऱ्या मुला-मुलींची नेहमी लगबग सुरु असते. त्यांनाही शेफची आवड़ निर्माण व्हावी म्हणून स्वतंत्र कुकिंग स्पर्धेच आयोजन रोटरी क्लबने केलं आहे. लिटल मास्टर शेफ या नावाने घेतली जाणारी ही स्पर्धा ८ ते १४ वयोगटातील लहान मुलांसाठी ही स्पर्धा आहे. नॉन गॅस कुकिंग म्हणजे गॅस न वापरता करता येणाऱ्या पदार्थाची स्पर्धा २ गटात होणार असल्याची माहिती रोटरी हेरिटेजचे अध्यक्ष मोहन चौबळ, सचिव हर्षद बावनकर, दीपा बारटक्के यांनी दिली. या स्पर्धेसाठी आतापर्यंत विविध शाळामधील ८० विद्यार्थ्यांनी नोंदणी केली असून मुंबईतील प्रसिद्ध शेफ तुषार प्रीती देशमुख या स्पर्धेचे विजेते निवडणार आहेत. ही स्पर्धा आम्ही प्रथमच आयोजित करत आहोत.
या स्पर्धेच आयोजन दिनांक १ सप्टेंबर रोजी सकाळी १० ते ५ यावेळेत करण्यात आले आहे. नाव नोंदणी सुरु असुन नोंदणीसाठी ९५५२५४४९६८ या क्रमांकावर संपर्क साधण्याचे आवाहन केले आहे. तसेच या स्पर्धेत सहभागी होण्यासाठी प्रति विद्यार्थी २०० रूपये शुल्क आकारण्यात येणार असल्याची माहितीही संयोजकांनी दिली.

सिंधू अंतिम फेरीत, नीरज चोप्राला भालाफेकीत सुवर्ण

जकार्ता | आशियाई स्पर्धेचा नववा दिवस भारतासाठी संमिश्र राहिला. कांस्यपदक, रौप्यपदक आणि सुवर्णपदक मिळविण्यात भारतीय खेळाडू यशस्वी ठरले. नीरज चोप्रा याने भालाफेकीत ८८.०६ मीटर फेक घेत सुवर्णपदक पटकावले. ही फेक घेत त्याने स्वतःचाच राष्ट्रीय विक्रम मोडीत काढला. १९८२ साली गुरतेज सिंग याने जिंकलेल्या कांस्यपदकानंतर भालाफेकीत भारताचे हे पहिलेच पदक ठरले.

महिलांच्या ३००० मीटर अडथळ्यांच्या शर्यतीत सुधा सिंग हिने कांस्यपदक पटकावले. धरून अय्यासामी याने पुरुषांच्या ४०० मीटर हर्डल क्रीडाप्रकारात कांस्यपदक पटकावले. जपानच्या जागतिक क्रमवारीत २ नंबरला असणाऱ्या अकाने यामागुचीवर उपांत्य फेरीत विजय मिळवत पी.व्ही.सिंधू हिने अंतिम फेरीत धडक मारली. दुसरीकडे उपांत्य फेरीत पराभूत झाल्याने भारताच्या साईना नेहवालला कांस्यपदकावर समाधान मानावे लागले. तिला तैवानच्या ताई तझु यिंगने पराभवाचा धक्का दिला.

महिलांच्या लांब उडी स्पर्धेत नीना वरकिलने उत्तम कामगिरीसह रौप्यपदक मिळवले. नवव्या दिवसखेर भारताची पदकसंख्या ४१ झाली असून टेबल टेनिस, बॅडमिंटन, अॅथलेटिक्स या क्रीडाप्रकारातून आणखी पदके अपेक्षित आहेत.

मुंबई | आरोग्य, पोषण आहार, शिक्षण, कृषि, जलसंधारण, आर्थिक समावेशन, कौशल्य विकास आणि मूळ पायाभूत सुविधा या क्षेत्रातील विविध विकासांच्या कामासाठी नंदूरबार, गडचिरोली, वाशिम आणि उस्मानाबाद या चार जिल्ह्यांना मुख्यमंत्री यांनी १२१ कोटी रुपयांचा अतिरिक्त निधी आज जाहिर केला.

या चार आकांक्षित जिल्ह्यांमधील विकास कामांच्या प्रगतीचा मुख्यमंत्री देवेंद्र फडणवीस यांनी व्हिडिओ कॉन्फरन्सद्वारे आढावा घेतला. या बैठकीला राज्यमंत्री दीपक केसरकर, मुख्य सचिव दिनेशकुमार जैन व इतर अधिकारी वर्ग उपस्थित होता.

मुंबई | नागरिकांना पारदर्शक,गतिमान आणि कालबद्ध सेवा देण्यासाठी पारित केलेल्या महाराष्ट्र लोकसेवा हक्क अधिनियमाच्या बोधचिन्ह व घोषवाक्याचे मुख्यमंत्री देवेंद्र फडणवीस यांच्या हस्ते आज अनावरण झाले.

लोकसेवा हक्क कायद्याच्या लोकप्रियतेसाठी घेण्यात आलेल्या बोधचिन्ह स्पर्धेत नरेश अग्रवाल यांच्या बोधचिन्हाची तर उत्कृष्ट घोषवाक्य स्पर्धेत हेमंत कानडे यांच्या घोषवाक्याची निवड करण्यात आली. यावेळी या दोघा स्पर्धकांना मुख्यमंत्र्यांच्या हस्ते प्रत्येकी २५ हजारांचे पारितोषिक देण्यात आले. या प्रसंगी मुख्य सेवा हक्क आयुक्त स्वाधिन क्षत्रिय, प्रधान सचिव भूषण गगराणी, एसव्हीआर श्रीनिवास आदी उपस्थित होते.

पुणे | राष्ट्रीय एकात्मता जपण्यासाठी अनेक संस्था नानाविध कार्यक्रमाचे आयोजन करत असतात. परंतु वंदे मातरम संघटनेने आणि फीनिक्स फाउंडेशन यांनी दरवर्षी प्रमाणे पुस्तक दहीहंडीचे आयोजन करत राष्ट्रीय एकात्मता जपली आहे. सर परशुरामभाऊ महाविद्यालय येथे जुने पुस्तक स्विकारण्याच्या उपक्रमाचे आयोजन केले आहे. गडचिरोली जिल्ह्यात या उपक्रमाअंतर्गत आजपर्यंत ३३ ग्रथालये उभारण्यात आली आहेत, वंदे मातरम संघटनेचे या कार्यक्रमाचे १४ वे वर्ष आहे. जुनी व सर्व प्रकारची शैक्षणिक, वैनिक पुस्तकांचा स्वीकार या वेळी घेण्यात येणार असल्याची माहिती संघटनेचे प्रदेश अध्यक्ष वैभव वाघ व प्रदेश कार्याध्यक्ष सचिन जामगे यानी दिली.
१ सप्टेंबर रोजी सकाळी ११ वाजता या पुस्तकी दहीहंडी संपन्न होणार आहे.

मुंबई | अमित येवले

पूर्व-भारतात तयार झालेल्या एका कमी दाबाच्या पट्ट्यामुळे पूर्व-विदर्भात २७ आणि २८ ऑगस्ट रोजी पावसाचा जोर वाढेल, असा अंदाज हवामान तज्ज्ञांनी व्यक्त केला आहे. यामुळे या दरम्यान गडचिरोली, चंद्रपूर, यवतमाळ, गोंदिया आणि भंडारा जिल्ह्यांत मध्यम ते जोरदार पावसाची शक्यता आहे.

पावसाच्या या स्थितीमुळे नदी-नाल्यांना पूर येण्यासारखी स्थिती उद्भवू शकते ज्यामुळे काही गावांचा संपर्क देखील तुटू शकतो. म्हणूनच नदी-नाल्यांच्या काठी राहणाऱ्या लोकांनी सावध राहावे. या दरम्यान पूर्व विदर्भात हलका ते मध्यम स्वरूपाच्या पावसाची तर उर्वरित विदर्भ, मराठवाडा आणि खानदेशात हलक्या पावसाची शक्यता असणार आहे.

नवी दिल्ली | जम्मू कश्मीर राज्याचे राज्यपाल सत्यपाल मलिक यांनी आज पंतप्रधान नरेंद्र मोदी यांची भेट घेतली. नुकतीच त्यांची जम्मू कश्मीर या राज्याचे राज्यपालपदी नियुक्ती झाली आहे.

काश्मीर खोऱ्यात वाढता तणाव व तेथील लागु असलेली राष्ट्रपती राजवट या बाबतीत या भेटीला महत्त्व प्राप्त झाले आहे. सत्यपाल मलिक या अगोदर बिहारचे राज्यपाल होते. मेहबुबा मुफ्ती व भाजप यांच्यातील युती तुटल्यानंतर पहिल्यांदाच राजकीय हालचालींना काश्मीरमध्ये वेग आला आहे.

नागपूर | ज्येष्ठ सामाजिक कार्यकर्ते व प्रसिद्ध पत्रकार उमेश चौबे यांचं नुकतंच निधन झालं. गरीब, वंचित व पीडितांसाठी आयुष्यभर संघर्षरत असलेल्या उमेशबाबूंनी समाजसेवेला वाहून घेतले होते. अंधश्रद्धा निर्मूलनाच्या कार्यातही उमेशबाबूंनी स्वत:ला झोकून दिले. उमेशबाबूंनी आपल्या विचारांशी आणि सिद्धांताशी कधीही तडजोड केली नाही. त्यांच्या विचारांचा आदर्श डोळ्यापुढे ठेवून वंचितांना व अन्यायग्रस्तांना न्याय मिळवून देणे हीच त्यांना खरी श्रद्धांजली ठरेल,अशा शब्दात मुख्यमंत्री देवेंद्र फडणवीस यांनी आपल्या भावना व्यक्त केल्या.

तामिळनाडूचे राज्यपाल बनवारीलाल पुरोहित म्हणाले, उमेशबाबूंनी आपले सारे आयुष्य गोरगरिबांच्या सेवेसाठी,वंचित व अन्यायग्रस्तांना न्याय मिळवून देण्यासाठी व्यतित केले. समाजातील विविध वंचित घटकांसाठी त्यांनी सतत संघर्ष केला. त्यांनी आपली पत्रकारिताही सडेतोडपणे केली. अतिशय साधेपणाने जीवन जगणाऱ्या उमेशबाबूंनी सिद्धांतांबाबत कधीही तडजोड केली नाही,

वसंतराव देशपांडे सभागृह येथे विदर्भ गौरव प्रतिष्ठान व उमेशबाबू चौबे मित्र परिवार यांच्या वतीने स्व. उमेशबाबू चौबे श्रद्धांजली सभेचे आयोजन करण्यात आले. यावेळी तामिळनाडूचे राज्यपाल बनवारीलाल पुरोहित,केंद्रीय परिवहन मंत्री नितीन गडकरी,खासदार डॉ. विकास महात्मे,आमदार डॉ. आशिष देशमुख, डॉ. मिलींद माने, दत्ता मेघे, सतीश चतुर्वेदी, यादवराव देवगडे, गिरीश गांधी, अटल बहादुर सिंग,महानगरपालिकेचे विरोधी पक्षनेता तानाजी वनवे आदी उपस्थित होते.

ट्विटर लिंक –

CM @Dev_Fadnavis spoke on Late Umeshbabu’s commitment towards the upliftment of poor, deprived, his struggle for preserving values and announced institution of Gold Medal in his name in the RTMNU Journalism Department. pic.twitter.com/8ZoPzfW76H

— CMO Maharashtra (@CMOMaharashtra) August 26, 2018