हत्तीणीच्या मारेकऱ्यांना शिक्षा देण्यासाठी केरळ सरकार प्रयत्नशील- मुख्यमंत्री पी. विजयन

वृत्तसंस्था । केरळमध्ये एका हत्तीणीला स्फोटकांनी भरलेला अननस खायला देण्यात आला होता. ज्यात त्या गर्भवती हत्तीणीचा मृत्यू झाला. हे प्रकरण देशभरात उसळी घेत आहे. सोशल मीडियावरून हे कृत्य केलेल्या लोकांना गंभीर शिक्षा झाली पाहिजे अशी मागणी होते आहे तर मानवतेला काळिमा फासणारे कृत्य म्हणून या कृत्याचा निषेध देखील केला जातो आहे. या सर्व प्रकरणावर केरळचे मुख्यमंत्री पी. विजयन यांनी ट्विटर वरून आम्ही या हत्येतील दोषींना शिक्षा देण्यासाठी आम्ही सर्वतोपरी प्रयत्न करू  असे ट्विट केले आहे. तसेच ३ संशयितांवर लक्ष केंद्रित केले असून त्यांची चौकशी केली जात असल्याचे त्यांनी सांगितले आहे.

“पलक्कड जिल्ह्यातील या दुःखद घटनेत एका गर्भवती हत्तीणीला आपला प्राण गमवावा लागला आहे. तुमच्यातील बरेच जण आमच्यापर्यंत पोहोचले आहेत. मी तुम्हाला खात्री देतो की तुमची चिंता व्यर्थ जाणार नाही. न्यायाचा विजय होईल” असे त्यांनी म्हंटले आहे. यासोबतच या घटनेचा वापर आमच्याविरुद्ध द्वेषाची मोहीम राबविण्यात केला जात आहे याचे दुःख वाटते असे त्यांनी त्यांच्या ट्विट मध्ये म्हंटले आहे. काहींनी अर्धवट सत्य आणि चुकीच्या वर्णनावरून सत्य लपविण्याचा प्रयत्न केला होता. काहींनी तर वर्णनात कट्टरता आणण्याचा प्रयत्न केला. असेही ते म्हणाले.

ब्रेकिंग बातम्या मोबाईलवर मिळवण्यासाठी आम्हाला 7972630753 या नंबरला WhatsApp करा आणि लिहा “Hello News.”