सरकारने ऑनलाईन औषध विक्रीवर बंदी घालावी; CAIT चे केंद्रीय मंत्र्यांना आवाहन

नवी दिल्ली । व्यापाऱ्यांची संघटना असलेल्या कॉन्फेडरेशन ऑफ ऑल इंडिया ट्रेडर्स म्हणजेच CAIT ने देशात औषधांच्या ऑनलाइन विक्रीवर बंदी घालण्याची मागणी सरकारकडे केली आहे. ही मागणी अशा वेळी करण्यात आली आहे जेव्हा वॉलमार्टच्या मालकीची ई-कॉमर्स कंपनी फ्लिपकार्टने 6 एप्रिल रोजी ऑनलाइन माध्यमातून औषधांची विक्री करण्याची घोषणा केली होती.

ट्रेडर्स बॉडी CAIT ने गुरुवारी जारी केलेल्या निवेदनात म्हटले आहे की, त्यांनी या संदर्भात वाणिज्य मंत्री पीयूष गोयल आणि केंद्रीय आरोग्य मंत्री मनसुख मांडविया यांना पत्र देखील लिहिले आहे. या पत्रात, CAIT ने देशातील औषधांच्या ऑनलाइन विक्रीवर ई-फार्मसी कंपन्यांवर तात्काळ बंदी घालण्याची मागणी केली आहे. औषध आणि सौंदर्य प्रसाधने कायदा आणि नियम (DC Act and Rules) मधील तरतुदींचे पूर्णपणे पालन करता यावे यासाठी ही मागणी केल्याचे संघटनेने म्हटले आहे.

CAIT चे राष्ट्रीय अध्यक्ष बीसी भरतिया आणि सरचिटणीस प्रवीण खंडेलवाल यांनी सांगितले की, “DC कायदा आणि नियम देशात औषधांची आयात, उत्पादन, विक्री आणि वितरण नियंत्रित करतात. तसेच सार्वजनिक आरोग्य आणि सुरक्षिततेसाठी कठोर तरतुदी आहेत. भारतीय कायद्यातील मध्यस्थ तरतुदींचा फायदा घेण्यापासून त्यांना रोखण्यासाठी ई-फार्मसी कंपन्यांवर बंदी घालण्याची विनंतीही त्यांनी सरकारला केली आहे.”

हेल्थकेअर सेक्टरमध्ये Flipkart ची एन्ट्री
विशेष म्हणजे, फ्लिपकार्टने हेल्थकेअर सेक्टरमध्ये एन्ट्री घेतली आहे. कंपनीने Flipkart Health+ हे नवीन अ‍ॅप लाँच केले आहे, ज्याचा फायदा घेऊन देशभरातील 20,000 हून जास्त पिनकोड्सना सर्व्हिस पुरवली जाईल. कंपनीने बुधवारी एका निवेदनात म्हटले आहे की Flipkart Health+ प्लॅटफॉर्म 500 स्वतंत्र विक्रेत्यांना रजिस्टर्ड फार्मासिस्टच्या नेटवर्कशी जोडेल. त्यामुळे डॉक्टरांच्या प्रिस्क्रिप्शनला मान्यता मिळेल आणि योग्य औषधांचा पुरवठा सुनिश्चित होईल.