औरंगाबाद – लग्नाचे आमिष दाखवून 14 आणि 15 वर्षाच्या दोन अल्पवयीन मुलींवर बलात्कार करण्यात आल्याची घटना उघडकीस आली आहे. मुकुंदवाडी ठाण्यात गुन्हा दाखल झाल्यानंतर पोलिसांनी तत्काळ दोन्ही आरोपींना अटक केली असल्याची माहिती पोलीस निरीक्षक ब्रम्हा गिरी यांनी दिली.
मुकुंदवाडी ठाण्यात दाखल फिर्यादीनुसार, 14 वर्षाच्या अल्पवयीन मुलीवर ऑगस्ट 2021 ते 22 फेब्रुवारी 2022 पर्यंत संजय नगर येथील अमोल सुभाष पवार याने लग्नाचे आमिष दाखवून वारंवार अत्याचार केला. अमोलचा विवाह झाला असून त्याला दोन मुले आहेत. पीडिता त्याच्या मुलांना खेळविण्यात येत होती. तेव्हा अमोल तिला पहिल्या पत्नीला सोडून देऊन तुझ्या सोबत लग्न करणार असल्याचे सांगून अत्याचार करीत होता. ही बाब पीडितेच्या कुटुंबीयांना समजल्यानंतर त्यांनी पोलीस ठाण्यात तक्रार दिली. बलात्कारासह पोक्सो कायद्यानुसार गुन्हा नोंदवण्यात आला आहे. पोलिसांनी अमोलला अटक केली असून पुढील तपास उपनिरीक्षक प्रवीण वाघ करत आहेत.
दुसरी घटना मुकुंदनगर येथे घडली. या प्रकरणातील मुलगी 15 वर्षाची असून मुकुंदनगरातील आजीकडे आल्यानंतर तिची आरोपी लक्ष्मण उर्फ अक्षय गोविंद दराडे (21) यांच्या सोबत ओळख झाली. त्याने लग्नाचे आमिष दाखवून नोव्हेंबर 2020 ते 22 फेब्रुवारी 2022 पर्यंत अत्याचार केले. मुकुंदवाडी पोलिसांनी आरोपीस अटक केली आहे. याप्रकरणी पुढील तपास सहायक निरीक्षक सचिन मिरधे करत आहेत.