लातूर | नोकरीचे आमिष देऊन फसवणूक करून धमकी दिल्याने राहत्या घरी दोन सख्ख्या मावस बहिणीने एकाच साडीने लोखंडी रॉडला गळफास घेऊन आत्महत्या केल्याचा धक्कादायक प्रकार समोर आला आहे. ही घटना शहरातील विश्वकर्मा कॉलनी येथे शनिवारी सकाळच्या सुमारास घडली.
याबद्दल सविस्तर वृत्त असे की, गीतांजली दत्तात्रय बनसोडे, वय 17 वर्षे आणि धनश्री संतराम शिरसागर, वय 30 वर्षे असे आत्महत्या करणाऱ्या मुलींची नावे आहेत. गीतांजली व धनश्री या धनश्रीच्या घरी एकत्र राहत होत्या. काही दिवसापूर्वी त्या घरातून न सांगता निघून गेल्या होत्या. शोध घेऊनही न सापडल्याने हरवल्याची तक्रार त्यांच्या कुटुंबातील सदस्यांनी एमआयडीसी पोलीस ठाण्यात नोंदवली होती.
तीन दिवसापूर्वी त्या स्वतः पुणे येथून त्यांच्या घरी परतल्या होत्या. मात्र शनिवारी सकाळी गीतांजली व धनश्री यांनी गळफास घेऊन आत्महत्या केली. याप्रकरणी दत्तात्रय बनसोडे यांनी दिलेल्या फिर्यादीवरून पंकज सुतार (रा. गोविंदनगर लातूर) विरोधात एमआयडीसी पोलीस ठाण्यात गुन्हा नोंदविण्यात आला आहे.