Thursday, October 6, 2022

Buy now

उरमोडी धरणात प्लॅस्टिक कॅन बांधून पोहणाऱ्या युवकाचा मृत्यू

सातारा प्रतिनिधी | शुभम बोडके

सातारा तालुक्यातील परळी खोऱ्यात असलेल्या उरमोडी धरणात पोहण्यासाठी गेलेल्या चार मित्रांपैकी एका युवकाचा मृत्यू झाला आहे. सज्जनगडाच्या पायथ्याशी असलेल्या उरमोडी धरणात ही दुर्देवी दुर्घटना घडली. या घटनेची नोंद सातारा तालुका पोलिस ठाण्यात करण्यात आलेली आहे.

घटनेची मिळालेली माहिती अशी, उरमोडी धरणाच्या सांडव्यात चार मित्र पोहण्यासाठी गेले असता. एका युवकाचा पाण्यात बुडून मृत्यू झाला आहे. अलोक संतोष शिंदे (वय- 18, रा. पाटखळ, ता. सातारा) असे मृत्यू झालेल्या युवकाचे नाव आहे. मंगळवारी दि. 15 रोजी दुपारी दोन वाजण्याच्या सुमारास चाैघेजण उरमोडी धरणात पोहण्यासाठी गेले होते. यामध्ये अलोक शिंदे हाही होण्यासाठी गेला होता.

दरम्यान, अलोकला आणि त्याच्या मित्रांना पोहता येत नव्हते. तरीदेखील उरमोडी धरणाच्या सांडव्यात अंगाला प्लॅस्टिकचे कॅन बांधून पाण्यात उतरले होते. मात्र, काही वेळातच अंगाला बांधलेले कॅन काढल्याने तो बुडू लागला. यावेळी त्याच्या मित्रांनी अलोकला पाण्यातून बाहेर काढण्याचा प्रयत्न केला. मात्र हा प्रयत्न अयशस्वी ठरला. त्याला तात्काळ सातारा जिल्हा शासकीय रुग्णालयात दाखल केले, मात्र डॉक्टरांनी त्याला तपासणीअंती मृत घोषित केले. सातारा तालुका पोलीस ठाण्यात अकस्मात मृत्यूची नोंद करण्यात आली आहे