आगामी विधानसभा निवडणुकीचे वारे राज्यामध्ये जोरदार वाहू लागले आहेत अशातच महायुती सरकार आता मोठमोठे निर्णय घेताना दिसत आहे. ‘लाडकी बहीण योजना’ असेल किंवा विविध प्रकल्पांचा उद्घाटन असेल महायुती सरकार विधानसभेच्या पार्श्वभूमीवर कसोशीने प्रयत्न करताना दिसत आहे. अशातच आज झालेल्या राज्य मंत्रिमंडळाच्या बैठकीमध्ये 19 महत्वपूर्ण निर्णय घेण्यात आले आहेत. ही बैठक मुख्यमंत्री एकनाथ शिंदे यांच्या अध्यक्षतेखाली झाली असून यामध्ये उपमुख्यमंत्री देवेंद्र फडणवीस आणि अजित पवार यांचाही उपस्थिती होती.
ही बैठक हे राज्य सरकारची शेवटची मंत्रिमंडळ बैठक असण्याची शक्यता वर्तवण्यात आली आहे यामध्ये धारावी पुनर्विकासासाठी मुंबईतील 125 एकर जागा देण्याचा निर्णय शिंदे सरकारने घेतला आहे. याबरोबरच मुंबईमध्ये येण्यासाठीच्या पाच टोल नाक्यावर हलक्या वाहनांसाठी टोल रद्द करण्यात आला आहे. याबरोबरच पुणे, ठाणे, मुंबई या महत्त्वाच्या शहरांसाठी आजच्या बैठकीमध्ये निर्णय घेण्यात आल्याचे दिसून येत आहे. चला जाणून घेऊया शिंदे सरकारचे महत्वपूर्ण 19 निर्णय
राज्य मंत्रिमंडळाच्या बैठकीतील महत्वपूर्ण निर्णय
- मुंबईतल्या पाचही प्रवेश मार्गांवरील पथकर (टोल) हलक्या वाहनांसाठी माफ करण्यात येत आहे. आज रात्री 12 वाजल्यापासून अंमलबजावणी केली जाणार आहे. (सार्वजनिक बांधकाम)
- आगरी समाजासाठी महामंडळाची स्थापना करण्यात येणार. (सामाजिक न्याय)
- समाजकार्य महाविद्यालयांमधील अध्यापकांना करिअर ॲडव्हान्समेंट स्किम लागू केली जाणार. (उच्च व तंत्रशिक्षण)
- दमणगंगा एकदरे गोदावरी नदी जोड योजनेस मान्यता देण्यात आली. (जलसंपदा)
- आष्टी उपसा सिंचन योजनेस सुधारित मान्यता देण्यात आली. (जलसंपदा)
- वैजापूरच्या शनीदेवगाव बंधाऱ्यास प्रशासकीय मान्यता देण्यात आली. (जलसंपदा विभाग)
- राज्य शेती महामंडळाची जमीन एमआयडीसीला हस्तांतरित करण्याचा निर्णय घेण्यात आला. (महसूल)
- पाचपाखाडी येथील जमीन ठाणे मनपास प्रशासकीय भवनासाठी देण्याचा निर्णय झाला. (महसूल)
- खिडकाळी येथील जमीन हायब्रिड स्किल विद्यापीठासाठी विनामूल्य देण्याचा निर्णय घेतला गेला. (महसूल)
- राज्यात प्रधानमंत्री आवास योजना (शहरी) 2.0 राबविणार असल्याचं निश्चित झालं.
- पुणे मेट्रो रेल टप्पा-2 मधील रेल्वे मार्गिंकांच्या कामांना मान्यता देण्यात आली. (नगर विकास)
- किल्लारीच्या शेतकरी सहकारी कारखान्याचे कर्ज व्याजासह माफ करण्याचा निर्णय. (सहकार)
- अडचणीतील सहकारी उपसा जलसिंचन योजनांचे थकीत कर्ज माफ करण्याचा निर्णय घेतला गेला. (सहकार)
- मिरजच्या शासकीय वैद्यकीय महाविद्यालयात इमर्जन्सी मेडिसिनची 3 पदे जाहीर केली गेली. (वैद्यकीय शिक्षण)
- खंड क्षमापित झालेल्या वैद्यकीय अधिकाऱ्यांना जुनी पेन्शन योजना लागू करण्याचा निर्णय घेतला. (वैद्यकीय शिक्षण)
- मराठी भाषेविषयक जनजागृतीसाठी पंधरवडा साजरा केला जाणार. (मराठी भाषा)
- अण्णासाहेब जावळे मराठवाडा विकास मंडळासाठी अभ्यासगट स्थापन केला जाणार.
- उमेदसाठी अभ्यासगट स्थापन केला जाणार. (ग्राम विकास)
- कौशल्य विद्यापीठास रतन टाटा यांचे नाव देण्याचा निर्णय घेण्यात आला. (कौशल्य विकास)