हॅलो महाराष्ट्र ऑनलाईन। (Aadhar Card Update) आधार कार्ड हे प्रत्येक भारतीय नागरिकासाठी आवश्यक आहे. कारण आधार कार्ड हे आपण भारताचे नागरिक आहोत यासाठीचे आपले ओळखपत्र आहे. या अत्यंत महत्त्वाच्या दस्तऐवजात भारतीय नागरिकाचे नाव, पत्ता, वय, लिंग, व्यवसाय, संपर्क क्रमांक आणि फोटो अशी सर्व आवश्यक माहिती असते. त्यामुळे आधार कार्ड हे भारतातील सर्वात महत्त्वपूर्ण दस्तऐवज आहे. आधार कार्ड काढल्यानंतर काही वर्षांनी ते अपडेट करावे लागते. दरम्यान, जर तुम्हीही तुमचे आधार कार्ड अपडेट करण्याचा विचार करत असाल तर घाई करा. कारण तुमच्याकडे केवळ ८ दिवस बाकी आहेत.
फक्त ८ दिवस बाकी
आजकाल कोणत्याही बँकेत खाते उघडणे असो किंवा सरकारी योजनांचा लाभ घेणे असो आधार कार्ड जरुरी आहे. इतकंच काय तर, साधं सिमकार्ड जरी घ्यायचं असेल तर आवश्यक कागदपत्रांमध्ये आधारकार्डची मागणी केली जाते. (Aadhar Card Update) यामुळे आधार कार्ड अपडेट नसेल तर अनेक कामे रखडण्याची शक्यता नाकारता येत नाही. दरम्यान, तुम्हाला जर तुमचे आधार कार्ड मोफत अपडेट करायचे असेल तर तुमच्याकडे फारच कमी वेळ शिल्लक आहे. कारण आधार कार्ड मोफत अपडेट करून मिळण्यासाठी केवळ १४ मार्च २०२४ पर्यंतचा कालावधी आहे. अर्थात तुमच्याकडे आजपासून बरोबर ८ दिवस बाकी आहेत.
आधार अपडेटसाठी ‘ही’ माहिती आवश्यक
तुमचे आधार कार्ड तुम्ही स्वतः आधार केंद्रावर जाऊन किंवा घरातून ऑनलाइन पद्धतीने अपडेट करू शकता. यासाठी तुम्हाला तुमचा डेमोग्राफिक डेटा, पूर्ण पत्ता, जन्मतारीख, मोबाईल नंबर इत्यादी आवश्यक माहिती द्यावी लागेल. आधार कार्ड अपडेट करताना बराच डेटा तुम्ही सहज ऑनलाईन भरू शकता. (Aadhar Card Update) मात्र, आयरिस किंवा बायोमेट्रिक डेटा अपडेट करण्यासाठी तुम्हाला आधार केंद्रावरच जावे लागेल. लक्षात घ्या, मोफत आधार अपडेटची सुविधा केवळ ऑनलाइन अपडेटवर उपलब्ध आहे. त्यामुळे जर तुम्ही आधार कार्ड अपडेट करण्यासाठी आधार केंद्रावर गेलात तर तुम्हाला आवश्यक शुल्क भरावे लागेल.
आधार कार्ड ऑनलाईन अपडेट कसे करता येईल? (Aadhar Card Update)
तुमच्याकडे लॅपटॉप आणि इंटरनेट सुविधा असेल तर अगदी घरबसल्या तुम्ही आरामात ऑनलाईन पद्धतीने आधार कार्ड अपडेट करू शकता. यासाठी खाली दिलेल्या स्टेप्स फॉलो करा.
- UIDAI च्या अधिकृत वेबसाईटला भेट द्या.
- यावर आधार अपडेटचा पर्याय निवडा.
- जो डेटा अपडेट करायचा आहे त्याचा पर्याय निवडा. उदा. पत्ता अपडेट करण्यासाठी अपडेट ॲड्रेस हा पर्याय निवडावा लागेल.
- आता तुमचा नोंदणीकृत मोबाईल क्रमांक टाका. (Aadhar Card Update)
- मोबाईल नंबरवर OTP येईल तो भरून घ्या.
- पुढे Documents Update चा पर्याय निवडा.
- तुमच्यासमोर आधार कार्डशी संबंधित तपशील येईल.
- यात सर्व तपशील सत्यापित करा.
- मग पत्ता अपडेट करण्यासाठी आवश्यक असलेली कागदपत्रे अपलोड करा.
- त्यानंतर आधार अपडेट प्रक्रिया स्वीकारा.
- पुढे तुम्हाला १४ अंकी अपडेट रिक्वेस्ट नंबर (URN) मिळेल.
- याद्वारे तुम्हाला आधार अपडेटच्या प्रक्रियेचा मागोवा घेता येईल. (Aadhar Card Update)