उज्जैनच्या रामघाटावर असलेले ‘धर्मराज-चित्रगुप्त मंदिर’ बनले आहे मृत्यूच्या शांतीची अखेरची आशा. इथे भक्त देवाकडे चिरंतन विश्रांतीसाठी नवस करतात. ‘मोक्षासाठी पूजा’ ही संकल्पनाच एक अद्वितीय अध्यात्मिक सत्य बनली आहे.
मंदिरात आपण नेहमी जीवनातील सुख, आरोग्य, समृद्धीसाठी देवाकडे प्रार्थना करतो. पण मध्यप्रदेशातील उज्जैन शहरात शिप्रा नदीच्या रामघाटावर असलेले धर्मराज आणि चित्रगुप्त मंदिर या पारंपरिक श्रद्धेच्या संकल्पनांवर वेगळाच दृष्टिकोन देतं. इथे भक्त स्वतःसाठी किंवा कोणत्याही मृत्युपथावर असलेल्या प्रियजनासाठी… मोक्षाची याचना करतात. आणि विशेष म्हणजे केवळ २४ तासांत या पूजेस फळ मिळतं, असं येथील शतकोटी भक्त आणि पूजाऱ्यांचा दावा आहे.
मोक्षासाठी नवस
या मंदिरात नवस करणे म्हणजे चिरंतन विश्रांतीसाठीची प्रार्थना. ज्या व्यक्तीला असाध्य रोग, शारीरिक वेदना किंवा असह्य जीवनप्रवाह थांबवायचा आहे, त्याच्या नावाने येथे तुपाचा दिवा लावला जातो. हा दिवा धर्मराज आणि चित्रगुप्त या न्यायाधीश देवांना अर्पण केला जातो. मान्यता अशी आहे की, या दिव्यामुळे त्या व्यक्तीच्या जीवनप्रवासाचा पूर्णविराम म्हणजेच मोक्ष प्राप्त होतो.
२४ तासांत परिणाम
या पूजेनंतर केवळ २४ तासांत सकारात्मक परिणाम जाणवतो, असा अनुभव असंख्य भाविकांनी घेतला आहे. अनेकदा आजाराने त्रस्त व्यक्तींचे शांत निधन झाल्याचे उदाहरणे आहेत, तर काहींना आरोग्य लाभल्याचाही अनुभव आहे.पंडित राकेश जोशी, या मंदिराचे शतकानुशतकाचे पूजारी, सांगतात की त्यांच्या पूर्वजांनी ४०० वर्षांपासून हे मंदिर सांभाळले असून, १७०२ सालातही येथे पूजांचे पुरावे आहे.
कर्कवृत्तावर असलेले एकमेव मंदिर
हे मंदिर कर्कवृत्तावर असल्याने ज्योतिषशास्त्रात याचे महत्त्व अधिक आहे. यामुळे इथे केलेली प्रत्येक पूजा आणि नवस आध्यात्मिक दृष्ट्या अधिक फलदायी मानले जातात. दूरदूरून भक्त येथे येतात. असाध्य रोग, कष्टदायक जीवनप्रश्न किंवा निवारण न होणाऱ्या दोषांपासून मुक्तीसाठी.
एक अंतिम आशा
जगात अनेक मंदिरं आरोग्य, सुख, समृद्धीसाठी प्रसिद्ध असली तरी, मृत्यू आणि मोक्षासाठी इथे येणारी श्रद्धा ही भक्तांच्या अंतर्मनातील एक प्रामाणिक तडफड आहे. या मंदिराचा अध्यात्मिक महिमा मृत्यूला शांतीचा आणि मोक्षाचा मार्ग म्हणून स्वीकारण्याचा संदेश देतो.
