हॅलो महाराष्ट्र ऑनलाईन। (Juna Furniture) अनेकदा घरातील वयस्कर व्यक्तींना ‘आऊटडेटेड’, ‘अडगळीतले सामान’ असे म्हटले जाते. परंतु याच सामानाची किंमत आणि ताकद काय आहे? हे सांगणारा चित्रपट लवकरच येत्या २६ एप्रिल २०२४ रोजी सिनेमागृहात प्रदर्शित होत आहे. महेश वामन मांजरेकर दिग्दर्शित ‘जुनं फर्निचर’ या चित्रपटाचा ट्रेलर लाँच सोहळा नुकताच दिमाखात पार पडला. या सोहळ्याला अधिक रंगात आणण्यासाठी वैभव जोशी यांच्या ‘सोबतीचा करार’ या संगीत मैफलचेही आयोजन यावेळी करण्यात आले. यात स्वप्नील बांदोडकर, केतकी माटेगावकर, पवनदीप राजन यांचाही सहभाग होता. यावेळी महेश मांजरेकर यांनी ‘काय चुकले सांग ना?’ या मनाला स्पर्शून जाणाऱ्या गाण्याच्या काही ओळी गायल्या.
जुनं फर्निचर… या म्हाताऱ्याला अडवूनच दाखवा! (Juna Furniture)
‘जुनं फर्निचर’ या चित्रपटाची टॅगलाईन ‘या म्हाताऱ्याला अडवूनच दाखवा!’ फारच चर्चेत आहे. सिनेमाच्या ट्रेलरवरूनच हा चित्रपट ज्येष्ठ नागरिकांच्या अस्तित्वावर भाष्य करणारा आहे, हे कळते. मुलांप्रती असलेल्या कर्तव्यांमध्ये आपण कमी पडणार याची चिंता आईवडिलांना नेहमीच असते. परंतु तीच चिंता, काळजी, जबाबदारी आई वडिलांच्या म्हातारपणात मुलं बजावतात? वृद्धापकाळात मुलांकडून चार प्रेमाचे शब्द ऐकण्याची इच्छा असते. ती इच्छाही ही पिढी पूर्ण करू शकत नसेल, तर आई वडिलांनी या वयात कोणाकडून प्रेमाची अपेक्षा ठेवावी? असा प्रश्न ट्रेलर पाहून मनात उद्भवतो. आपल्या पोटच्या मुलावरच आईच्या मृत्यूचा आरोप गोविंद पाठक यांनी लावला असून आता या प्रकरणाचा निकाल काय लागणार? याचे उत्तर प्रेक्षकांना चित्रपट पाहूनच मिळणार आहे.
तगडी स्टारकास्ट
सत्य- सई फिल्म्स आणि स्कायलिंक एन्टरटेनमेंट प्रस्तुत ‘जुनं फर्निचर’ (Juna Furniture) या आगामी नव्या चित्रपटाची निर्मिती यतिन जाधव यांनी केली आहे. तर चित्रपटाची मूळ कथा, पटकथा आणि संवाद स्वतः महेश वामन मांजरेकर यांनी लिहिले आहेत. या चित्रपटाच्या माध्यमातून एक दमदार कलाकारांची फळी प्रेक्षकांच्या भेटीस येत आहे. यामध्ये महेश मांजरेकर, मेधा मांजरेकर, भूषण प्रधान, अनुषा दांडेकर, समीर धर्माधिकारी, डॉ. गिरीश ओक, विजय निकम, संतोष मिजगर, अलका परब, शरद पोंक्षे या कलाकारांच्या मुख्य भूमिका असणार आहेत.
काय म्हणाले महेश मांजरेकर?
चित्रपटाबद्दल दिग्दर्शक महेश वामन मांजरेकर म्हणतात, ‘जुनं फर्निचर… या नावातच चित्रपट काय आहे, याचा संदर्भ लागतो. अनेक घरांमध्ये हल्ली असे चित्र दिसतेय. बाहेरही अनेक ठिकाणी ज्येष्ठांना जुनं फर्निचर (Juna Furniture) म्हणूनच संबोधले जातेय आणि याबाबतचा किस्सा मी स्वतः पाहिला आहे. त्यातूनच मला हा विषय सुचला. मी या चित्रपटाबद्दल एकच सांगेन ”जुनं फर्निचर”ला कमी समजू नका. त्यांच्यात जी ताकद आहे, ती आताच्या तकलादू फर्निचरमध्ये अजिबात नाही. ही ताकद फक्त शारीरिकच नाही तर मानसिक आणि भावनिकदृष्ट्याही तितकीच खमकी आहे. हा चित्रपट प्रत्येकाने आपल्या मुलांसोबत नक्की पाहावा, त्यातून कदाचित मुलांचा दृष्टीकोन बदलेल’.