हॅलो महाराष्ट्र ऑनलाईन । आपला भारत हा देश अनेक विविधतेने नटलेला आहे. भारत हे हिंदू राष्ट्र असलं तरी देशात अनेक जाती – धर्माचे लोक गुण्यागोवींदाने नांदतात. हिंदू असो वा मुस्लिम असो किंवा शीख इसाई असो सर्वजण एकमेकांविषयीचा बंधुभाव जपताना आपण पाहतो. भारतात वेगवगेळ्या प्रदेशानुसार किंवा राज्यानुसार वेगवेगळी भाषा बोलली जाते. यामध्ये हिंदी, मराठी, तेलगू, कन्नड, गुजराती, उर्दू, पंजाबी अशा भाषा बोलताना किंवा ऐकताना आपण बघितल्या असतील. परंतु भारतात असेही एक गाव आहे ज्याठिकाणी फक्त संस्कृत भाषा बोलली जाते. गावातील हिंदू असो किंवा मुस्लिम असो तो सुद्धा संस्कृतच बोलतो. चला तर या गावाबद्दल संपूर्ण माहिती जाणून घेऊया….
कर्नाटक राज्यातील शिमोगाच्या डोंगराळ भागात ८ किलोमीटर अंतरावर मत्तूर नावाचं एक गाव वसलेलं आहे, या गावातला प्रत्येक माणूस आजही संस्कृत भाषेतच बोलतो आणि भाषा जपतो. गावातील रस्त्यांवर संस्कृत ही सामान्य भाषा म्हणून ऐकणं हा एक अनोखा अनुभव आहे. भाजी विक्रेत्यापासून पुजार्‍यापर्यंत सर्वजण इथे प्राचीन भाषेतच बोलतात. मत्तूर हे ५००० लोकांचे सांस्कृतिकदृष्ट्या समृद्ध गाव आहे ज्याची मूळ भाषा संस्कृत आहे. या गावातील बहुतेक रहिवासी, लहान मुलांसह, संस्कृतमध्ये अस्खलितपणे बोलू शकतात.
४० वर्षांपासून सुरु आहे परंपरा –
सुमारे ४० वर्षांपूर्वी संस्कृत भारती या संस्थेकडून सदर गावात दहा दिवसांची प्रशिक्षण कार्यशाळा भरवण्यात आली होती. अनेक भाषांची जननी असलेल्या संस्कृत भाषेच्या संवर्धनासाठी इथूनच लोकांचे परिश्रम सुरू झाले. त्या दिवसापासूनच मत्तुर ह्या गावात दहा वर्षे पूर्ण झालेला प्रत्येक विद्यार्थी वेद आणि उपनिषदांचे शिक्षण घेतो. गुरु शिष्य परंपरेचे पालन येथे पूर्ण श्रद्धेने केले जाते. संस्कृत जीवन व शिक्षण पद्धती अवलंबिली असूनही ते आधुनिक जगापासून अलिप्त नाहीत. इतकंच नाही, येथील लोकांचे राहणीमान फारच साधं व परंपरेला धरून आहे. त्यांच्या भिंतींवर संस्कृत घोषवाक्ये लिहीलेली आढळतात.
मत्तूर हे मूलत: एक कृषीप्रधान गाव आहे. इथे सुपारी आणि भात पिकवलं जातं. रहिवाशांमध्ये ६०० वर्षांपूर्वी केरळमधून स्थलांतरित झालेल्या प्राचीन ब्राह्मण समुदायाचा समावेश आहे. एक मनमोहक छोटेसं गाव असल्याने, येथे रामाचे मंदिर, भगवान शिवाचे लहान मंदिर, सोमेश्वर मंदिर आणि लक्ष्मीकेशव मंदिर वगळता कोणतेही पर्यटन स्थळ नाही. तुम्हाला अधिक एक्सप्लोर करायचे असल्यास, तुंगा नदीच्या काठावर असलेले मत्तूरचे जुळे गाव, होसाहल्लीला भेट देता येते. कर्नाटकातील कथाकथन आणि गायनाची प्राचीन कला गामका देखील मत्तूर व होसाहल्ली वासियांनी जतन केलेली आहे. खऱ्या अर्थाने संस्कृत भाषा जगणारे ही गावं आहेत.
मत्तूरमध्ये भेट देण्यासारखी ठिकाणे: मत्तूर हे एक गावातील रहिवासी पाहुण्यांचा आदरातिथ्य करतात. गावातील आकर्षणांपैकी एक मंदिरांचा लहान समूह आहे जो मुख्य गावाच्या चौकापासून ८०० मीटर अंतरावर आहे. (रामाचे मंदिर, शिवालय आणि सोमेश्वराचे मंदिर) हा परिसर एक सुंदर सुशोभित परिसर आहे ज्यामध्ये बाग आणि जवळून वाहणारा लहान गोड्या पाण्याचा प्रवाह पहायला मिळतो.
मत्तूरला भेट देण्याची उत्तम वेळ: मत्तूरला वर्षभर भेट देता येते. परंतु नोव्हेंबर ते मार्च हा कालावधी भेट देण्यास सर्वोत्तम काळ आहे.
विशेष माहिती: मत्तूर हे एक छोटेसे गाव आहे ज्यात जेवणाची ठिकाणे किंवा गेस्ट हाऊस नाहीत. हे ठिकाण एका दिवसाच्या भेटीसाठी योग्य आहे. पाहुण्यांना काही दिवस गावात राहायचे असल्यास गावातील पाठशाळेत राहता येतं. याशिवाय शिमोगा येथे अनेक गेस्ट हाउस आणि रेस्टॉरंट्सची सोय आहे.
मत्तूरला कसं जायचं?
मत्तूर बेंगळुरूपासून ३०० किमी अंतरावर आहे. मत्तूरला पोहोचण्याचा सर्वात सोपा मार्ग म्हणजे कर्नाटकातील मुख्य शहरांपैकी एक असलेला शिमोगा.
शिमोगा येथे पोहोचण्यासाठी सर्वात जवळचे विमानतळ मंगलोर विमानतळ आहे, जे स्थळापासून सुमारे १९५ किमी अंतरावर आहे. अभ्यागत मंगलोर येथील विमानतळावरून शिमोगा येथे जाण्यासाठी टॅक्सी किंवा कॅब भाड्याने घेऊ शकतात आणि नंतर स्थानिक वाहतुकीद्वारे मत्तूरला जाऊ शकतात.
शिमोगाला रेल्वेस्थानकाची सोय आहे. शिमोगा येथे जाण्यासाठी पर्यटक कर्नाटकातील प्रमुख शहरांमधून ट्रेनने प्रवास करु शकतात. मत्तूरला जाण्यासाठी रेल्वे स्टेशनवरून स्थानिक वाहतूक भाड्याने घेतली जाऊ शकते.
शिमोगा ते मत्तूरपर्यंत अनेक बसेस देखील आहेत. शिमोगाहून मत्तूरला जाण्यासाठी अभ्यागत ऑटो रिक्षा देखील भाड्याने घेऊ शकतात.