राजधानी मुंबईपासून उपराजधानी नागपूरपर्यंत थेट आणि जलद प्रवास घडवून आणणारा समृद्धी महामार्ग म्हणजेच हिंदूहृदयसम्राट बाळासाहेब ठाकरे महाराष्ट्र समृद्धी महामार्ग आता पूर्णत्वाच्या उंबरठ्यावर आहे. या महत्वाकांक्षी प्रकल्पाचा शेवटचा टप्पा लवकरच सर्वसामान्य नागरिकांसाठी खुला होणार असल्याची शक्यता आहे.
१ मे रोजी महामार्ग संपूर्ण खुला?
सध्या नागपूर ते इगतपुरी असा सुमारे 625 किमीचा मार्ग खुला आहे, परंतु इगतपुरी ते आमणे या 76 किमीच्या अखेरच्या टप्प्याची प्रतीक्षा अजून संपलेली नाही. महाराष्ट्र राज्य रस्ते विकास महामंडळाने (MSRDC) याआधीही काही तारखा जाहीर केल्या होत्या, पण त्या पुढे ढकलण्यात आल्या. आता महाराष्ट्र दिनी म्हणजेच 1 मे 2025 रोजी हा टप्पा अखेर खुला होणार असल्याची चर्चा रंगली आहे. जर हे प्रत्यक्षात उतरले, तर मुंबई ते नागपूरचा प्रवास फक्त 8 तासांमध्ये पूर्ण होणार आहे, ज्यामुळे प्रवाशांना प्रचंड दिलासा मिळेल.
टप्प्यानुसार झालेली प्रगती
- 11 डिसेंबर 2022: पंतप्रधान नरेंद्र मोदी यांच्या हस्ते नागपूर ते शिर्डी (520 किमी) या पहिल्या टप्प्याचे उद्घाटन
- 23 मे 2023: शिर्डी ते भरवीर (105 किमी) टप्पा सुरू
- 4 मार्च 2024: भरवीर ते इगतपुरी टप्पा वाहतुकीसाठी खुला
- *आता प्रतीक्षा आहे – इगतपुरी ते आमणे (76 किमी) या शेवटच्या टप्प्याची
55 हजार कोटींचा खर्च
सुमारे 55,000 कोटी रुपयांच्या खर्चातून उभारलेला हा महामार्ग भविष्यात जेएनपीटी बंदर आणि नागपूर इंटरनॅशनल एअरपोर्टला जोडला जाणार आहे. यामुळे फक्त प्रवासीच नव्हे, तर मालवाहतुकीसाठीही हा मार्ग अत्यंत फायदेशीर ठरणार आहे.
मुख्यमंत्री फडणवीस करणार लोकार्पण?
प्राप्त माहितीनुसार, मुख्यमंत्री देवेंद्र फडणवीस यांच्या हस्ते अखेरचा टप्पा महाराष्ट्राला समर्पित केला जाण्याची शक्यता आहे. याबाबत अधिकृत घोषणा लवकरच होण्याची अपेक्षा आहे.
समृद्धी महामार्गाचा प्रवास अंतिम टप्प्यात आहे. 1 मे रोजी तो संपूर्णपणे खुला झाला, तर नागपूर-मुंबई प्रवासाचा चेहरामोहरा बदलणार आहे, आणि महाराष्ट्राच्या विकासाच्या दिशेने आणखी एक निर्णायक पाऊल पडणार आहे.
