महाराष्ट्रात विधानसभेच्या निवडणुकीचा बिगुल वाजला आहे. येत्या 20 नोव्हेंबरला मतदान तर 23 नोव्हेंबरला मतमोजणी करण्यात येणार आहे. राज्यात आचारसंहिता सुद्धा लागू करण्यात आली आहे. निवडणूक जाहीर झाल्यानंतर आता राज्यात राजकीय घडमोडींना प्रचंड वेग आला आहे. अशातच निवडणुकांच्या तारखा जाहीर होताच कोणत्या दिवशी ‘ड्राय डे’ असेल हे देखील स्पष्ट झालं आहे.
निवडणुकांच्या काळात मतदारांना आकर्षित करण्यासाठी विविध माध्यमातून मतदारांना लालूच दिले जाते. जेवणावळी, पैसे , दारू वाटून मतदारांना आमिष दिले जाते. याच पद्धतीच्या चुकीच्या गोष्टी होऊ नयेत म्हणून निवडणुकीच्या महत्वाच्या दिवसांमध्ये दारू विक्रीला बंदी केली जाते. राजकीय पक्षांनी आणि उमेदवारांनी मतदारांना लालूच देण्यासाठी दारूचा वापर करू नये यासाठी निवडणूक आयोगानं मतदानाच्या 48 तास आधी म्हणजे दोन दिवस आधी ड्राय डे घोषित केला जातो तसा नियमच बनवण्यात आला आहे आणि यामानुसार मतदारांना अमिष म्हणून दारू सेवन आणि वितरण रोखण्यासाठी संपूर्ण राज्यांमध्ये दारूची दुकान बंद ठेवली जातात.
महाराष्ट्रात कोणत्या दिवशी ड्राय डे?
महाराष्ट्रात कोणत्या दिवशी ड्राय डे असणार आहे याची माहिती आता समोर आली आहे. 1 नोव्हेंबरला दिवाळीनिमित्त, 12 नोव्हेंबरला कार्तिकी एकादशीनिमित्त तर 15 नोव्हेंबरला गुरुनानक जयंती निमित्त ड्राय डे असणार आहे. तर 18 नोव्हेंबरला संध्याकाळी 5 वाजल्यानंतर विधानसभा निवडणुकीच्या प्रचाराच्या तोफा थंड होतील तेव्हापासून ते 20 नोव्हेंबरला मतदान पार पडेपर्यंत राज्यातील दारूचे दुकान बंद राहणार आहेत. 23 नोव्हेंबरला निवडणुकीचा निकाल असल्यामुळे त्यादिवशी देखील ड्राय डे असणार आहे.