भारतीय रेल्वेच्या ‘अमृत भारत स्टेशन योजना’अंतर्गत महाराष्ट्रातील 132 रेल्वे स्थानकांमध्ये पुणे जिल्ह्यातील 9 स्थानकांची निवड झाली असून, या स्थानकांचा चेहरामोहरा लवकरच पूर्णपणे बदलणार आहे. पुण्यातील दौंड व केडगाव ही दोन महत्त्वाची रेल्वे स्थानके या योजनेचा भाग ठरली असून, त्यासाठी तब्बल 56 कोटी 50 लाख रुपयांचा निधी मंजूर करण्यात आला आहे.
या संदर्भात केंद्रीय रेल्वेमंत्री अश्विनी वैष्णव आणि मुख्यमंत्री देवेंद्र फडणवीस यांच्या उपस्थितीत झालेल्या उच्चस्तरीय बैठकीत या योजनेची माहिती देण्यात आली.
दौंड स्थानकाच्या उन्नतीसाठी 44 कोटी, तर केडगावसाठी 12 कोटी 50 लाख इतका निधी मिळाला आहे. या निधीतून प्रवाशांसाठी आधुनिक वेटिंग लाउंज, फूड कोर्ट्स, हायजिनिक स्वच्छतागृहे, लिफ्ट्स व एक्सलेटर्स, तसेच डिजिटल सुविधा आणि अत्याधुनिक दळणवळण व्यवस्था उभारली जाणार आहे. यामुळे प्रवासाचा अनुभव अधिक सुकर, सुरक्षित आणि आरामदायक होणार आहे.
पुणे जिल्ह्यातील इतर स्थानकांनाही खालीलप्रमाणे निधी मंजूर
- बारामती: 11 कोटी 40 लाख
- आकुर्डी: 34 कोटी
- चिंचवड: 20 कोटी 40 लाख
- देहू रोड: 8 कोटी 50 लाख
- तळेगाव: 40 कोटी 34 लाख
- हडपसर: 25 कोटी
- उरुळी कांचन: 13 कोटी
या योजनेंतर्गत सर्व स्थानकांचे सौंदर्यीकरण, सुविधा आणि कनेक्टिव्हिटी सुधारली जाणार असून, ही आधुनिकता रेल्वेच्या माध्यमातून प्रादेशिक विकासालाही गती देणार आहे.‘अमृत भारत स्टेशन’ योजना फक्त स्थानकांचा बदल नव्हे, तर प्रवाशांच्या अनुभवाचा नवा अध्याय आहे.
अमृत भारत स्टेशन योजना ही भारतीय रेल्वेने सुरू केलेली एक महत्वाकांक्षी योजना आहे, जी देशभरातील रेल्वे स्थानकांचे आधुनिकीकरण करण्यासाठी राबवली जात आहे. या योजनेचा उद्देश केवळ स्थानकांचे सौंदर्यीकरण करणे नाही, तर प्रवाशांना आधुनिक, सुरक्षित आणि सोयीस्कर सुविधा प्रदान करणे हा देखील आहे.
योजनेची ठळक वैशिष्ट्ये:
- सर्वसमावेशक विकास:
योजनेत स्थानकांचा केवळ देखावा नव्हे, तर प्रवेशद्वारे, प्रतीक्षालये, पार्किंग, लिफ्ट-एस्कलेटर, स्वच्छतागृहे, पिण्याचे पाणी, सोलर उर्जेचा वापर अशा सुविधा वाढवण्यावर भर. - भविष्यातील गरजांसाठी तयार:
वाढती प्रवासी संख्या आणि भविष्यातील तांत्रिक गरजा लक्षात घेऊन स्टेशन विकसित केली जात आहेत. - स्मार्ट स्टेशन संकल्पना:
आधुनिक इन्फॉर्मेशन डिस्प्ले, डिजिटल सिग्नेज, WiFi, CCTV सुरक्षा, कचरा व्यवस्थापन यांचा समावेश. - स्थानिक संस्कृतीचा समावेश:
स्टेशनच्या डिझाइनमध्ये स्थानिक इतिहास, संस्कृती, शिल्पकला आणि स्थापत्य यांचा समावेश केला जातो.
