हॅलो महाराष्ट्र ऑनलाईन । राज्याच्या दृष्टीने महत्वाच्या असलेल्या राज्य मंत्रिमंडळाची बैठक आज मंत्रालयात पार पडली. यावेळी मुख्यमंत्री एकनाथ शिंदे व उपमुख्यमंत्री देवेंद्र फडणवीस यांनी अनेक महत्वाचे निर्णय घेतले. यामध्ये राज्यातील शाळांना 1100 कोटी रुपयांचे अनुदान देण्याचा महत्वपूर्ण निर्णय आजच्या बैठकीत घेण्यात आला. तसेच एकूण 16 निर्णयही यावेळी
घेण्यात आले.
मुख्यमंत्री एकनाथ शिंदे यांच्या अध्यक्षतेखाली आज राज्य मंत्रिमंडळाच्या बैठकीत अनेक महत्वाच्या राज्यातील प्रकल्पांवर चर्चा करण्यात आली. यावेळी बैठकीस उपमुख्यमंत्री देवेंद्र फडणवीस यांच्यासह विधानसभेचे विरोधी पक्षनेते अजित पवार, विधानपरिषदेचे विरोधी पक्षनेते अंबादास दानवे, विधानसभा उपाध्यक्ष नरहरी झिरवाळ, महसूलमंत्री राधाकृष्ण विखे पाटील, सांस्कृतिक कार्यमंत्री सुधीर मुनगंटीवार, संसदीय कार्य मंत्री चंद्रकांत पाटील, बंदरे विकासमंत्री दादाजी भुसे आदी मान्यवर उपस्थित होते.
✅ राज्यातील शाळांना अनुदान. ११०० कोटींना मान्यता
✅ महाअधिवक्ता श्री आशुतोष कुंभकोणी यांचा राजीनामा स्वीकृत#मंत्रिमंडळनिर्णय
— CMO Maharashtra (@CMOMaharashtra) December 13, 2022
यावेळी मुख्यमंत्री शिंदे यांनी महाअधिवक्ता आशुतोष कुंभकोणी यांचा राजीनामा बैठकीत स्वीकारला. त्याचप्रमाणे अनेक महत्वाचे निर्णय मंत्रिमंडळाच्या बैठकीत घेण्यात आले.
✅ शेतजमिनीच्या ताब्यावरून वाद मिटवणारी सलोखा योजना. नाममात्र नोंदणी व मुद्रांक शुल्क आकारणार
✅ राज्यात काजू फळपिक विकास योजना लागू होणार. कोकणातील शेतकऱ्यांना होणार फायदा.
✅ शासनमान्य सार्वजनिक ग्रंथालयाच्या अनुदानात ६० टक्के वाढ. वाचनसंस्कृतीला मिळणार बळ.
— CMO Maharashtra (@CMOMaharashtra) December 13, 2022
‘हे’ घेतले 16 महत्वाचे निर्णय….
1) जलयुक्तशिवार अभियान 2.0 सुरु करण्याचा निर्णय घेण्यात आला असून राज्यातील गावे पुन्हा जलसमृद्ध होणार आहेत.
2) जळगांव जिल्ह्यातील कुऱ्हा-वढोदा इस्लामपूर उपसा सिंचन योजनेला गती दिली जाणार असून 2 हजार 226 कोटी सुधारित खर्चास मान्यता देण्यात आली.
3) आदिवासी शासकीय आश्रमशाळेतील 1 हजार 585 रोजंदारी कर्मचाऱ्यांना नियमित करण्याचा निर्णय बैठकीत घेण्यात आला.
4) खेड्यांच्या सर्वांगीण विकासासाठी मनरेगा आणि इतर विविध विभागांची सांगड घालून राज्यातील ग्रामीण भागात सुविधा संपन्न कुटुंब मिशन राबविला जाणार आहे.
5) गगनबावडा आणि जत तालुक्यात मौजे संख येथे ग्राम न्यायालय उभारण्याचा बैठकीत घेण्यात आला.
6) शेतजमिनीच्या ताब्यावरून वाद मिटवणारी सलोखा योजना केली जाणार असून नाममात्र नोंदणी व मुद्रांक शुल्क आकारले जाणार आहे.
7) राज्यात काजू फळपिक विकास योजना लागू करण्याचा महत्वाचा निर्णय आजच्या बैठकीत घेण्यात आला असून त्याचा कोकणातील शेतकऱ्यांना फायदा होणार आहे.
8) शासनमान्य सार्वजनिक ग्रंथालयाच्या अनुदानात 60 टक्के वाढ करण्यात आली असून त्यामुळे वाचन संस्कृतीला बळ मिळणार आहे.
9) आजच्या मंत्रिमंडळाच्या बैठकीत कामगार कायद्यांमध्ये सुधारणा करण्याचा निर्णय घेण्यात आला. त्यानुसार कालबाह्य तरतुदी काढण्यात आल्या असून कारावासाऐवजी वाढीव दंडाची तरतूद करण्यात आली आहे.
10) 13 सहकारी संस्थांना दिलेल्या कर्जाच्या शासकीय थकहमीपोटी शासनाने बँकेस देय असलेली रक्कम अदा करण्याचा निर्णय आजच्या बैठकी घेण्यात आला.
11) पुणे जिल्ह्यातील आंबेगांव बु. येथील शिवसृष्टी प्रकल्पास 50 कोटी अनुदान देण्याचा निर्णयही बैठकीत घेण्यात आला.
12) पिंपरी चिंचवड विद्यापीठ आणि युनिव्हर्सल एआय विद्यापीठ, कर्जत या स्वयं अर्थसहाय्य विद्यापीठांना बैठकीत मान्यता देण्यात आली आहे.
13) महाराष्ट्र पोलीस अधिनियम आणि महाराष्ट्र सिनेमा अधिनियमात शिक्षेच्या सुधारित तरतुदी. ‘ईज ऑफ डुईंग बिझिनेस’ साठी निर्गुन्हेगारीकरण करणार
14) राज्यातील शाळांना 1100 कोटी रुपयांचे अनुदान देण्याचा महत्वपूर्ण निर्णय आजच्या बैठकीत घेण्यात आला.
15) राज्य मंत्रिमंडळाच्या बैठकीत महाअधिवक्ता श्री. आशुतोष कुंभकोणी यांचा राजीनामा घेण्यात आला.
16) स्वातंत्र्याच्या अमृत महोत्सवी वर्षात सामान्य प्रशासन विभागातील 75 हजार पदांची भरती प्रक्रियेला गती देण्याचा निर्णय मंत्रीमंडळाच्या बैठकीत घेण्यात आला.