हॅलो महाराष्ट्र ऑनलाईन । राष्ट्रवादी काँग्रेस अजित पवार गटाचे आमदार अमोल मिटकरी (Amol Mitkari) आणि महाराष्ट्र नवनिर्माण सेना यांच्यातील वाद आता विकोपाला गेला आहे. अमोल मिटकरी यांनी राज ठाकरे (Raj Thackeray) यांच्यावर टीका केल्यानंतर मनसे नेत्यांनी मिटकरींवर हल्लाबोल केला होता. त्यांची गाडीही फोडण्यात आली. अमोल मिटकरी जर राज ठाकरेंना आणखी काय बोलला तर त्याला कपडे काढून मारणारा असा सज्जड दम अमेय खोपकर यांनी दिला. तसेच संदीप देशपांडे आणि योगेश चिले यांनीही अजितदादा आणि अमोल मिटकरी यांच्यावर विखारी टीका केली होती. आता या सर्वाना अमोल मिटकरी यांनीही जशाच तस उत्तर दिले आहे. देशपांड्या, चिल्या, खोपकर यांची औकात काय? बायको तरी घरात विचारते का? असं म्हणत त्यांनी जहरी वार केला आहे.
प्रसारमाध्यमांशी बोलताना अमोल मिटकरी म्हणाले, मनसे हा पक्ष पळपुट्यांचा, सोंगाड्यांचा आहे. सुपारीबाज, गुंडशाही, झुंडशाही आणि बेवडेशाही असलेल्यांचा हा पक्ष आहे. देशपांड्या, चिल्या, खोपकर यांची औकात काय? घरात बायको इज्जत देत नाय आणि हे अजित पवारांवर भुंकायला लागलेत. अरे, चिल्या तुझे दुधाचे ओठ सुकलेले नसतील. बेट्या, जर अजितदादांनी तुझ्या राज ठाकरेने टीका करण्यास सुरुवात केली ना तर तुमच्या अंडरपॅन्ट शिल्लक राहणार नाहीत, लक्षात ठेव असा इशारा अमोल मिटकरी यांनी दिला.
योगेश चिले नेमकं काय म्हणाले होते?
शरद पवार कोर्टात केस जिंकले, तर अजितदादांना कटोरा घेऊन फिरावं लागेल, माझ्या पक्षाला नाव द्या, चिन्ह द्या करत… दुसर्याकडून भिकेने मिळालेल्या पक्षाच्या जीवावर जास्त उडू नका . अमोल मिटकरी, तुला पण जी विधान परिषद मिळालेली आहे ना ती सुद्धा शरद पवारांना भीक मागूनच मिळालेली आहे. त्यामुळे कधीतरी उभा रहा आणि जिंकून येऊन दाखव असे आव्हान योगेश चीले यांनी अमोल मिटकरी याना दिले. तसेच तुझ्या दादामध्ये जर हिम्मत असेल तर सगळे आमदार बाजूला ठेव, भाजपला बाजूला ठेव, शिंदेला बाजूला ठेव आणि सर्वसामान्य तरुणांना आमदार बनवून दाखव बघू किती यशस्वी होतोय असं म्हणत चीले यांनी अजित पवारांवरही निशाणा साधला होता.