पुणे | आजच्या सामाजिक परिस्थितीचा विचार करता सर्व धर्मियांनी धार्मिक सण अधिकाधिक समाजाभिमुख व मानवतावादी करणे हे धर्माकडे अधिक व्यापक दृष्टीने पाहण्याचे लक्षण आहे. महाराष्ट्र अंधश्रद्धा निर्मुलन समिती आणि मुस्लीम सत्यशोधक मंडळ यांच्यातर्फे “बकरी ईद” निमित्त पशूची कुर्बानी देण्याच्या प्रथेला विधायक पर्याय म्हणून दि. २२ ऑगस्ट ते ३० ऑगस्ट २०१८ या कालावधीत “राज्यव्यापी रक्तदान सप्ताह” अभियान राबविला जाणार आहे. धर्माने सांगितलेल्या मानवी मूल्यांमध्ये “त्याग” हे महत्वाचे मूल्य आहे. ईस्लाम धर्मात ही उच्च ध्येय सिध्द करण्यासाठी “कुर्बानी” किंवा सर्वस्वाचा त्याग करण्याची शिकवण आहे. या त्याग आणि बलिदानाचे प्रतीक म्हणून ‘ईद-उल-अजहा’ (बकरी ईद) चा सण इस्लाम धर्मियांमध्ये साजरा केला जातो. या निमित्ताने बकरे अथवा इतर प्राण्यांची कुर्बानी देण्याची प्रथाही पाळली जाते. या प्रथेला पर्याय देण्याचा प्रयत्न यानिमित्ताने होत आहे.
मुस्लीम बांधवासमवेत जाती-धर्मा पलीकडे मानवतेसाठी या राज्यव्यापी रक्तदान अभियानात सहभागी होण्याचं आवाहन महाराष्ट्र अंधश्रद्धा निर्मुलन समितीचे राज्य कार्याध्यक्ष अविनाश पाटील, मुस्लीम सत्यशोधक मंडळाचे अध्यक्ष प्रा. शमसुद्दीन तांबोळी व अंनिसचे विविध उपक्रम विभाग कार्यवाह अनिल करवीर,उल्हास ठाकूर यांनी केलं आहे.
———————————————-
पुणे (रक्तदान शिबिर)
बुधवार दि २२ ऑगस्ट २०१८
सकाळी ११ ते दुपारी २, बॅरिस्टर नाथ पै सभागृह, राष्ट्र सेवा दल, साने गुरुजी स्मारक, पर्वती पायथा, पुणे
संपर्क – ९८२२६७९३९१ – शमशुद्दीन तांबोळी
पिंपरी-चिंचवड येथील बांधवांनी कुर्बानी टाळून त्याऐवजी त्यासाठीचे पैसे केरळ पूरग्रस्तांसाठी मदत करण्याचे ठरवले आहे.
कोल्हापूर (रक्तदान)
बुधवार दि २२ ऑगस्ट २०१८
दुपारी ३ वाजता स्थळ – जीवनधारा ब्लड बँक, राजारामपुरी ७ वी गल्ली, कोल्हापूर