Bhausaheb Fundkar Orchard Plantation Scheme : परंपरागत शेतीच्या पलीकडे जाऊन शाश्वत उत्पन्नासाठी महाराष्ट्रातील शेतकऱ्यांसमोर एक सुवर्णसंधी उभी आहे. भाऊसाहेब फुंडकर फळबाग लागवड योजना आणि मनरेगा यांच्या संयुक्त उपक्रमातून फळबाग लागवडीसाठी आता १००% अनुदानासह सर्वतोपरी सहाय्य दिलं जात आहे. आंबा, डाळिंब, पेरू, लिंबू अशा बारमाही फळपिकांसह १६ फळपिकांच्या लागवडीला चालना देण्यासाठी ही योजना प्रभावी ठरत आहे.
या योजनेत शेतकऱ्यांना खड्डे खोदणे, रोपे लावणे, ठिबक सिंचन, खत व्यवस्थापन आणि पीक संरक्षणासाठी लागणारा सर्व खर्च शासन उचलते. अनुदान तीन टप्प्यांमध्ये – पहिल्या वर्षी ५०%, दुसऱ्या वर्षी ३०%, आणि तिसऱ्या वर्षी २०% अशा स्वरूपात दिलं जातं. विशेष बाब म्हणजे हे अनुदान थेट आधार लिंक्ड बँक खात्यात डीबीटीद्वारे जमा केलं जातं.
फळबाग लागवडीचा उद्देश केवळ उत्पन्नवाढ नसून, प्रक्रिया उद्योगांना कच्चा माल पुरवणं, पाण्याचा कार्यक्षम वापर, आणि पारंपरिक शेतीतून आधुनिक शेतीकडे वाटचाल घडवणं हेही आहे. ही योजना आजवर हजारो हेक्टर क्षेत्रावर यशस्वीपणे राबवली गेली असून, अनेक शेतकऱ्यांनी आपल्या उत्पन्नात लक्षणीय वाढ केली आहे.
शेतीची वाटणी फ्री मध्ये होणार; सरकारकडून दस्त नोंदणी शुल्क माफ
पात्रता आणि कागदपत्रे
योजनेचा लाभ घेण्यासाठी शेतकऱ्यांच्या नावावर ७/१२ उतारा असणं आवश्यक आहे. संयुक्त खातेदार असल्यास संमतीपत्र आवश्यक आहे. किमान लागवड क्षेत्र कोकणात ०.१० हेक्टर आणि इतर भागात ०.२० हेक्टर असावं लागतं. ठिबक सिंचन संच बसवणं अनिवार्य आहे आणि झाडांची जिवंतता पहिल्या वर्षी ८०%, दुसऱ्या वर्षी ९०% राखणं बंधनकारक आहे. अर्ज प्रक्रियेमध्ये अनुसूचित जाती-जमाती, महिला आणि दिव्यांग शेतकऱ्यांना विशेष प्राधान्य दिलं जातं.
अर्ज प्रक्रिया
शेतकऱ्यांना महाडीबीटी पोर्टल (https://mahadbt.maharashtra.gov.in) वर अर्ज करावा लागतो. अर्जासोबत ७/१२ उतारा, आधार कार्ड, बँक तपशील आणि इतर आवश्यक कागदपत्रे अपलोड करावीत. अर्जाचे शुल्क केवळ ₹२३.६० असून, मंजुरीनंतर २५-३० दिवसांत अनुदान मिळते.
कृषी क्षेत्राला नवसंजीवनी!
ही योजना केवळ आर्थिक सहाय्यापुरती मर्यादित नाही, तर शेतकऱ्यांना तांत्रिक मार्गदर्शन, प्रशिक्षण आणि उत्पादन व्यवस्थापनाचंही संपूर्ण पॅकेज देते. त्यामुळे शेतकरी आधुनिक शेतीकडे वळत असून, ग्रामीण भागात शेतीमधून नवा आर्थिक टप्पा गाठण्याचं स्वप्न या योजनेमुळे प्रत्यक्षात येत आहे.
शेतीचा चेहरा बदलायचा आहे? तर ही योजना तुमच्यासाठी सुवर्णसंधी ठरू शकते आजच अर्ज करा आणि तुमच्या शेतात फळांचा समृद्ध बहर फुलवा
