कोल्हापूर प्रतिनिधी । सतेज औंधकर
राष्ट्रीय स्वयंसेवक संघाचे सरकार्यवाहक भय्याजी जोशी यांनी केलेल्या विधानामुळे आम्हाला आनंद झाला. देवेंद्र फडणवीस हे फार काळ विरोधी पक्षनेते राहणार नाहीत, हे यातून स्पष्ट होत आहे. त्यांच्या दिल्लीतील कामाला शुभेच्छा आहेत, अशी खोचक प्रतिक्रिया जलसंपदामंत्री जयंत पाटील यांनी व्यक्त केली आहे. मुख्यमंत्री उद्धव ठाकरे यांनी पंतप्रधान नरेंद्र मोदी यांची भेट घेतली असली, तरी महाविकास आघाडी अभेद्य आहे. आमच्यामध्ये कोणतीही धुसफूस नसल्याचा दावाही त्यांनी केला.
आंतरराष्ट्रीय ब्राह्मण परिषदेच्या उद्घाटनासाठी जलसंपदा मंत्री जयंत पाटील शुक्रवारी कोल्हापुरात आले होते. यावेळी प्रसारमाध्यमांशी संवाद साधताना त्यांनी ही प्रतिक्रिया व्यक्त केली. भय्याजी जोशी यांनी फडणवीस फार काळ विरोधी पक्षनेतेपदी राहणार नाहीत, ते माजी मुख्यमंत्रीही राहणार नाहीत असं सूचक विधान केलं होतं. त्यावर पाटील यांना छेडले असता, त्यांच्या विधानामुळे फडणवीस विरोधीपक्षनेतेपदी फार काळ राहणार नसल्याचे स्पष्ट होत आहे. त्यामुळे त्यांच्या दिल्लीतील कामाला आमच्या शुभेच्छा आहेत, असा टोला पाटील यांनी लगावला.
मुख्यमंत्री उद्धव ठाकरे यांनी पंतप्रधान मोदी यांची भेट घेतल्यामुळे सीएए व एनआरसीबद्दल त्यांची भूमिका मवाळ झाली आहे का? असा प्रश्नही त्यांना करण्यात आला. तेव्हा, राज्यात उद्धव ठाकरे यांच्या नेतृत्वाखाली आम्ही काम करत आहोत. दोन्ही कायद्यांविषयी त्यांच्या भूमिकेवर मला बोलता येणार नाही. मात्र राज्यात महाविकास आघाडी अभेद्य असून कोणतीही धुसफूस नाही, असं ते म्हणाले. कोरेगाव-भीमा प्रकरणाच्या समांतर तपासाबद्दलचा निर्णय कागदोपत्री झालाय की नाही याबाबत माहिती नाही. दररोज माध्यमासमोर येवून कोणीही बोलत आहे. असेही ते म्हणाले.
पक्षाचे प्रवक्ते नवाब मलिक शिवजयंती कार्यक्रमात घोषणा देत नसल्याचा व्हिडिओ व्हायरल झाला आहे. त्यावरून मलिक यांच्यावर चौफेर टीका होत असून या विषयावरही पाटील यांनी त्याचं मत व्यक्त केलं. कोणी घोषणा दिल्या म्हणून पक्षाची धोरणे ठरत नाहीत. त्यामुळे घोषणा देणं न देण्याला फारसे महत्त्व नाही, असं त्यांनी स्पष्ट केलं.
दिवसभरातील ताज्या बातम्या तुमच्या मोबाईलवर मोफत मिळवण्यासाठी ”Hello News” टाईप करून 8080944419 या नंबरवर Whatsapp करा.