हॅलो महाराष्ट्र ऑनलाईन । महिलांवरील अत्याचाराच्या घटनांनी संपूर्ण देशात खळबळ उडाली असतानाच आता बिहारमधून एक धक्कादायक घटना समोर येत आहे. एका डॉक्टरनं त्याच्या दोन सहकाऱ्यांच्या मदतीनं एका नर्सवर सामूहिक बलात्कार (Rape) करण्याचा प्रयत्न केला. मात्र खंबीर नर्सने सर्जिकल ब्लेडने थेट डॉक्टरच्या गुप्तांगावर वार करत आपला बचाव केला. बिहारच्या समस्तीपूर जिल्ह्यातील मुसरीघरारी परिसरात ही घटना घडली. याप्रकरणी पोलिसांनी जखमी डॉक्टर आणि त्याच्या दोन सहकाऱ्यांना अटक केली आहे. डॉ संजय कुमार संजू, सुनील कुमार गुप्ता आणि मंगरा भागातील अवधेश कुमार अशी सदर आरोपींची नावे आहेत.
याबाबत अधिक माहिती अशी कि, आरोपी डॉक्टरने आपल्या सहकाऱ्यांसह मद्यप्राशन केलं होतं. त्यावेळी नर्स आरोग्य केंद्रात कर्तव्यावर होती. मात्र दारूच्या नशेत नर्सचा लैंगिक छळ करण्याचा प्रयत्न डॉक्टरांनी केला. तेव्हा स्वतःचे रक्षण करण्यासाठी नर्सने थेट डॉक्टरच्या गुप्तांगावर सर्जिकल बेडनं वार केले आणि ती रुग्णालयातून पळून गेली. यानंतर सुनील आणि अवधेश यांनी नर्सचा पाठलाग करत तिला पकडण्याचा प्रयत्न केला. पण तोपर्यंत नर्स पळून जाण्यात यशस्वी झाली होती. नर्स शेतात जाऊन लपली. तिथून तिनं ११२ क्रमांकावर फोन करुन पोलिसांना स्वतःवर आलेल्या प्रसंगाबाबत माहिती दिली.
सदर घटनेची माहिती मिळताच पोलीस काही मिनिटांत घटनास्थळी पोहोचले. पीडित नर्सला पोलीस ठाण्यात आणलं. नर्सच्या जबाबानुसार, डॉक्टर आणि त्याच्या दोन्ही सहकाऱ्यांना अटक करण्यात आली आहे. जखमी डॉक्टरवर सध्या रुग्णालयात उपचार सुरु आहेत. तर बाकीचे दोन्ही आरोपी डॉक्टर सध्या पोलीस कोठडीत आहे. पोलीस या घटनेचा अधिक तपास घेत आहेत. पोलिसांनी घटनास्थळावरून रक्ताने माखलेल्या बेडशीट, तीन मोबाईल फोन आणि दारूच्या बाटल्यांसह अनेक पुरावे जप्त केले आहेत. धक्कादायक म्हणजे ज्यावेळी हि सगळी घटना घडली त्यावेळी सीसीटीव्ही फुटेज बंद करण्यात आले होते.