जम्मू-कश्मीरमध्ये दहशतवादविरोधी लढाई पुन्हा तीव्र झाली असून, उधमपुर जिल्ह्यातील डुडु-बसंतगढ़ भागात गुरुवारी सकाळी सुरक्षाबल आणि दहशतवाद्यांमध्ये जोरदार चकमक झाली. या चकमकीत भारतीय लष्कराचा एक जवान शहीद झाला असून, दोन ते तीन दहशतवाद्यांना घेरण्यात सैनिकांना यश आलं आहे.
पहलगाम हल्ल्यानंतर सुरक्षा यंत्रणांचा मोठा मोर्चा
काही दिवसांपूर्वी पहलगाममध्ये झालेल्या दहशतवादी हल्ल्यानंतर जम्मू-कश्मीरमधील सुरक्षा यंत्रणा सतर्क झाल्या आहेत. लष्कर आणि जम्मू पोलिसांकडून संयुक्त सर्च ऑपरेशन सुरू असून, अनेक भागांमध्ये छाननी मोहीम राबवली जात आहे. याच मोहिमेदरम्यान डुडु-बसंतगढ़ परिसरात ही धडक कारवाई करण्यात आली.
भागात तणावपूर्ण स्थिती
गुरुवारी पहाटेच्या सुमारास सुरू झालेल्या चकमकीदरम्यान दहशतवाद्यांनी सुरक्षाबळांवर अचानक गोळीबार केला. त्याला प्रत्युत्तर देत लष्करानेही जोरदार कारवाई केली. सध्या परिसरात दोन्ही बाजूंनी अधूनमधून गोळीबार सुरू असून, मोठ्या प्रमाणावर लष्करी आणि पोलिस दल तैनात आहे.
सुरक्षा यंत्रणांच्या माहितीनुसार, हे दहशतवादी काही दिवसांपूर्वी रामनगर भागात सक्रिय असल्याचं आढळलं होतं. प्राथमिक अंदाजानुसार, हे तिघेही पाकिस्तानी दहशतवादी असू शकतात.
बारामुल्लामध्येही मोठी कामगिरी, दोन दहशतवादी ठार
याच दरम्यान बुधवारी (23 एप्रिल) बारामुल्ला जिल्ह्यात नियंत्रण रेषेजवळ (LoC) घुसखोरीचा प्रयत्न करताना दोन दहशतवाद्यांना ठार करण्यात आले. लष्कराच्या सूत्रांनुसार, या दहशतवाद्यांकडून दोन AK रायफल्स, एक चिनी बनावटीची पिस्तूल, 10 किलो स्फोटक (IED) आणि इतर दहशतवादी साहित्य जप्त करण्यात आलं आहे. यांचा उद्देश मोठी विध्वंसक घटना घडवण्याचा होता, पण तत्काळ कारवाई करत त्यांना निष्क्रिय करण्यात आलं.
100 पेक्षा अधिक दहशतवादी सक्रिय
लष्कराच्या माहितीप्रमाणे, सध्या काश्मीर खोऱ्यात 100 पेक्षा अधिक दहशतवादी सक्रिय आहेत. त्यामुळे सुरक्षादलांकडून सर्च ऑपरेशन्स आणि गस्त वाढवण्यात आली आहे. उधमपुरसह सीमावर्ती आणि संवेदनशील भागांमध्ये सतत कारवाया सुरू आहेत.
शहिद जवानाला देशाचा सलाम
उधमपुर चकमकीत वीरमरण आलेल्या जवानाला संपूर्ण देशाकडून श्रद्धांजली अर्पण केली जात आहे. सरकार आणि लष्कराकडून त्यांच्या कुटुंबीयांना योग्य ती मदत आणि आधार दिला जाणार असल्याचं आश्वासन देण्यात आलं आहे.
