तिरुअनंतपूरम | मागील १५ दिवसांपासून केरळमधील भीषण झालेली पूरस्थिती पावसाचा जोर ओसरल्यामुळे कमी होत आहे. दैनंदिन कामकाज हळुहळू पूर्वपदावर येत आहे. केरळच्या उभारणीसाठी व आपद्ग्रस्तांना मदतीसाठी १० हजार ५०० कोटी रुपयांची मदत आवश्यक असल्याचे मुख्यमंत्री पी विजयन यांनी सांगितले आहे. यातील २६०० कोटी रुपये केंद्राने द्यावेत असंही विजयन म्हणाले. जवळपास १ लाख घराचं व १० हजार किलोमीटर रस्त्याचं या आपत्तीत नुकसान झालं आहे.
दरम्यान मदतीसाठी विविध स्तरांतून मोठ्या प्रमाणावर पुढाकार येत आहे. सुशांत सिंग राजपूत याने १ कोटी, अहमदनगर मधील देहविक्रय करणाऱ्या महिलांनी ५० हजार रुपयांची मदत दिली आहे. विविध सामाजिक संघटनाही या कामात पुढाकार घेताना दिसत आहेत. केंद्राने मात्र देशांतर्गत पातळीवरच या प्रश्नाची सोडवणूक करण्याला प्राधान्य दिलं असून परकीय मदत स्वीकारण्यास तूर्त नकार दिला आहे.