Maharashtra Cable Stayed Bridge 2025 : महाराष्ट्राच्या रस्ते विकासाच्या इतिहासात एक नवीन आणि क्रांतिकारी पायरी जोडली जाणार आहे. कोकणातील रत्नागिरी जिल्हा आणि पश्चिम महाराष्ट्रातील सातारा जिल्हा या दोन भौगोलिकदृष्ट्या महत्त्वाच्या भागांना थेट जोडणारा आणि राज्यातील पहिलाच केबल स्टेड ब्रिज लवकरच प्रत्यक्षात येणार आहे. या प्रकल्पामुळे फक्त प्रवासाचे अंतर कमी होणार नाही, तर पर्यटन, स्थानिक अर्थव्यवस्था आणि नागरिकांच्या जीवनशैलीवरही दीर्घकालीन सकारात्मक परिणाम होणार आहे.
गेल्या काही वर्षांपासून कोकण आणि पश्चिम महाराष्ट्र (Maharashtra Cable Stayed Bridge 2025 ) यामधील जोडणी सुधारण्यासाठी विविध योजना राबवण्यात येत आहेत. अशातच या दोन विभागांना जोडणारा हा पूल म्हणजे एक ऐतिहासिक टप्पा मानला जातो. रत्नागिरी जिल्ह्यातून महाबळेश्वर किंवा सातारा भागात प्रवास करणाऱ्यांना यामुळे सुमारे ५० किलोमीटरचा मार्ग कमी होणार असून, प्रवासाची वेळ आणि इंधन खर्चात मोठी बचत होईल. या प्रकल्पामुळे कोकणातून महाबळेश्वरसारख्या पर्यटनस्थळी पोहोचणं अधिक सहज आणि वेगवान होणार आहे.
हा केबल स्टेड ब्रिज नेमका काय आहे?
या पुलाची लांबी ५४० मीटर असून, रुंदी १४ मीटर इतकी आहे. विशेष म्हणजे हा पूल पूर्णपणे केबल स्टेड प्रकारात विकसित केला जात आहे, ज्यामुळे त्याचा संरचनात्मक भार कमी होतो आणि तो सौंदर्यदृष्ट्याही आकर्षक दिसतो. यासाठी १७५ कोटी रुपयांचा खर्च अपेक्षित असून, टी अँड टी इन्फ्रास्ट्रक्चर या नामवंत कंपनीकडे काम देण्यात आले आहे. सध्याचे बांधकाम युद्धपातळीवर सुरू असून डिसेंबर २०२५ पर्यंत काम पूर्ण होण्याची अपेक्षा व्यक्त केली जात आहे.
पुलावरून महाबळेश्वरचं ‘व्ह्यू पॉइंट’
या भव्य प्रकल्पाची आणखी एक वैशिष्ट्य म्हणजे पुलाच्या मध्यभागी विकसित करण्यात येणारी ४३ मीटर उंचीची व्ह्यू गॅलरी. या गॅलरीतून पर्यटकांना महाबळेश्वरचा अविस्मरणीय नजारा पाहायला मिळणार आहे. यासाठी कॅप्सूल लिफ्ट, दोन्ही बाजूंनी जिना मार्ग, आणि संपूर्ण गॅलरीत आधुनिक प्रकाशयोजना प्रस्तावित करण्यात आली आहे. यामुळे हा पूल केवळ वाहतुकीसाठीच नाही तर एक आकर्षक पर्यटनस्थळ म्हणूनही विकसित होणार आहे.
”स्वप्नातलं घर, आता तुमचं होणार?” म्हाडाकडून ‘या’ विभागासाठी तब्बल 4000 घरांची सोडत
कोकण-पश्चिम महाराष्ट्र पर्यटनाला नवी दिशा
कोकणात दरवर्षी हजारो पर्यटक जात असतात. त्यात पश्चिम महाराष्ट्रातून – सातारा, सांगली, कोल्हापूर – या भागातून कोकणात येणाऱ्यांची संख्या लक्षणीय आहे. तसेच कोकणातील नागरिकही महाबळेश्वर, पाचगणी यांसारख्या थंड हवेच्या ठिकाणी वेळोवेळी भेटी देत असतात. हा पूल या दोन्ही प्रवाहांना एक नवी गती आणि सहजता देणार आहे. स्थानिक हॉटेल व्यवसाय, गाइड सेवा, वाहतूक, कृषी पर्यटन यालाही याचा अप्रत्यक्ष लाभ होईल.
हा प्रकल्प केवळ दोन जिल्ह्यांना जोडणारा पूल नाही, तर तो नव्या महाराष्ट्राचा, विकसित महाराष्ट्राचा प्रतीक ठरणार आहे. रस्त्यांची ही प्रगती म्हणजे आर्थिक, सामाजिक आणि पर्यावरणीयदृष्ट्या संधींचा नवा मार्गच आहे. येत्या काही वर्षांत राज्यात अशा अनेक आधुनिक आणि टिकाऊ पायाभूत सुविधा उभ्या राहणार आहेत, आणि त्यात या पुलाचं स्थान अग्रगण्य राहील हे निश्चित!
