उत्तर प्रदेश । संपूर्ण देश सध्या कोरोनाच्या संकटाचा मुकाबला करत आहे. कोरोनामुळे देशाला अनेक अडचणींना समोर जावं लागत आहे. कोरोनाशी लढताना संसाधन अपुरी पडत असताना अनेकजणांनी आर्थिक मदत सरकारला देऊ केली आहे. दरम्यान, उत्तर प्रदेशमधील हरदोई येथील भाजप आमदार श्याम प्रकाश यांनी कोरोनाग्रस्तांच्या मदतीसाठी दिलेला निधी परत म्हणून थेट जिल्हा प्रशासनाला पत्र लिहिलं आहे.
आमदार प्रकाश यांनी आपल्या आमदार निधीमधून २५ लाखांचा निधी कोरोनाग्रस्तांच्या मदतीसाठी दिला होता. या निधीमधून करोनाविरुद्ध लढण्यासाठी आरोग्य साहित्य तसेच इतर मदत साहित्य घेण्यात येणार होते. मात्र, हरदोई जिल्हा प्रशासनाने करोनासंदर्भातील खरेदी करताना भ्रष्टाचार केल्याने मला माझे पैसे परत हवे आहेत असं प्रकाश यांनी जिल्हा प्रशासनाला लिहलेल्या म्हटलं आहे. हरदोईमधील मुख्य विकास अधिकाऱ्यांनी मी केलेल्या आर्थिक मदतीचा कुठे आणि कसा वापर केला जाईल यासंदर्भात कोणतीच माहिती मला दिलेली नाही असंही प्रकाश यांनी म्हटलं आहे. तसेच प्रसारमाध्यमांमधील बातम्यांमधून हरदोई येथील कोरोनासंदर्भातील वैद्यकीय सामानाच्या खरेदीमध्ये भ्रष्टाचार झाल्याची माहिती आपल्याला मिळाल्याचे प्रकाश यांनी म्हटलं आहे.
आमदार निधीमधून मिळालेल्या मदतनिधी मध्येही भ्रष्टाचार आणि कमिशन घेतले जात असल्याचे आपल्याला समजले असल्याचे प्रकाश यांनी म्हटलं आहे. “मी दिलेल्या निधीचा कसा वापर केला जाणार आहे यासंदर्भात चौकशी करण्यात आली असता मला कोणतेही उत्तर देण्यात आलेले नाही. त्यामुळेच मी आता मुख्य विकास अधिकाऱ्यांना पत्र लिहिलं आहे. लोकप्रतिनिधी म्हणून मी करोनाविरुद्धच्या लढ्यासाठी दिलेले मदतनिधी त्याच कामासाठी वापरला जात आहे की नाही हे जाणून घेणे माझी जबाबदारी आहे. तसेच असं नसेल झालं तर हा निधी पुन्हा माझ्या खात्यावर वळता केल्यास मी त्याचा अधिक चांगल्या प्रकारे वापर करेल,” असं प्रकाश यांनी म्हटलं आहे. दरम्यान, कोरोनाच्या पार्श्वभूमीवर उत्तर प्रदेशमधील योगी सरकारने आमदारांना देण्यात येणारा विकास निधीवर एक वर्षांसाठी बंदी घातली आहे.
ब्रेकिंग बातम्या मोबाईलवर मिळवण्यासाठी आम्हाला 7972630753 या नंबरला WhatsApp करा आणि लिहा “Hello News.”