मुंबई । भाजपकडून राज्यातील परिस्थिती अस्थिर करण्याचे प्रयत्न सुरु असल्याची चर्चा जोर धरु लागली आहे. अशा वेळी राज्यात राष्ट्रपती राजवट लागू करण्याच्या भाजपच्या हालचालींवर शिवसेना नेते खासदार संजय राऊत यांनी भाजपाचा चांगलाच संचार घेतला. ‘भाजपचं सरकार लंडन आणि न्यूयॉर्कमध्ये येऊ शकतं. कारण, तिथंही कोरोनाची परिस्थिती गंभीर आहे. भाजपचे लोक तिथं सत्ता स्थापन करू शकतात. पण महाराष्ट्रात त्यांचं सरकार येणार नाही,’ असा सणसणीत टोला संजय राऊत यांनी भाजपाला लगावला आहे. ते एका वृत्तवाहिन्यांशी बोलत होते
यावेळी संजय राऊत यांनी महाराष्ट्रात राष्ट्रपती राजवट लागू होणार या सगळ्या अफवा असल्याचं म्हटलं आहे. ‘महाराष्ट्र सरकार अस्थिर करायचा आनंद कुणाला घ्यायचा असेल तर तो त्यांना घेऊ द्या. विरोधी पक्ष वेळ घालवण्यासाठी असा खेळ खेळत असेल तर तो त्यांनी खेळावा. त्यांना शुभेच्छा आहेत. पण सरकारला कोणताही धोका नाही. हे सरकार पाच वर्षे पूर्ण करेल आणि त्यापुढची निवडणूक सरकारमधील सर्व पक्ष एकत्रित लढवतील,’ असा विश्वास शिवसेना नेते खासदार संजय राऊत यांनी आज व्यक्त केला. ‘धोका असलाच तर तो विरोधी पक्षाला आहे. त्यामुळं त्यांनी काळजी घ्यायला हवी. राज्याला सक्षम विरोधी पक्षाची गरज आहे,’ असं ते म्हणाले.
दरम्यान, राष्ट्रवादी काँग्रेसचे अध्यक्ष शरद पवार यांनी काल राज्यपालांची घेतलेली भेट, त्यानंतर मुख्यमंत्री उद्धव ठाकरे यांच्याशी झालेली त्यांची चर्चा आणि भाजपचे खासदार नारायण राणे यांनी केलेल्या राष्ट्रपती राजवटीची मागणीच्या पार्श्वभूमीवर ठाकरे सरकारच्या भवितव्याबद्दल चर्चांना उधाण आले होते. त्यावर संजय राऊत यांनी राज्यातील सरकारला काही धोका नसल्याचे सांगत भाजपवर कडाडून प्रहार केला.
ब्रेकिंग बातम्या मोबाईलवर मिळवण्यासाठी आम्हाला 7972630753 या नंबरला WhatsApp करा आणि लिहा “Hello News.”