PSI 2023 | महाराष्ट्र लोकसेवा आयोगाने (MPSC) महाराष्ट्र अराजपत्रित गट-ब सेवा मुख्य परीक्षा २०२२ अंतर्गत पोलीस उपनिरीक्षक (PSI) संवर्गाची सर्वसाधारण गुणवत्ता यादी जाहीर केली आहे. या परीक्षेत अतिश मोरे यांनी सर्वाधिक गुण मिळवत राज्यात प्रथम क्रमांक पटकावला आहे. त्यामुळे सध्या त्यांच्यावर शुभेच्छा आणि कौतुकाचा वर्षाव केला जात आहे.
निकाल आणि गुणवत्ता यादीची घोषणा
एमपीएससीने प्रसिद्ध केलेल्या अधिकृत पत्रकानुसार, ५ नोव्हेंबर २०२३ रोजी झालेल्या परीक्षेसाठी एकूण ३७४ रिक्त पदांसाठी निवड प्रक्रिया राबवण्यात आली. त्यामुळे उमेदवार मोठ्या उत्सुकतेने निकालाची वाट पाहत होते. अखेर काल आयोगाने संकेतस्थळावर गुणवत्ता यादी जाहीर केली. ही गुणवत्ता यादी उमेदवारांच्या अर्जामध्ये नमूद केलेल्या विविध दाव्यांच्या आधारे तयार करण्यात आली आहे. मात्र, अंतिम निवड होण्यापूर्वी आवश्यक पडताळणी प्रक्रियेनंतर काही उमेदवारांच्या शिफारसींमध्ये बदल होण्याची शक्यता आहे.
महत्वाचे म्हणजे, खेळाडू आणि अनाथ प्रवर्गातून अर्ज केलेल्या उमेदवारांची निवड तात्पुरती असल्याचे आयोगाने स्पष्ट केले आहे. संबंधित उमेदवारांच्या प्रमाणपत्रांची अधिकृत अधिकाऱ्यांकडून पडताळणी झाल्यानंतरच अंतिम यादी तयार केली जाणार आहे. त्यामुळे सद्यस्थितीत जाहीर केलेली गुणवत्ता यादी ही तात्पुरती असून अंतिम यादीमध्ये बदल होऊ शकतो.
दरम्यान, सध्या MPSC २०२२ ची गुणवत्ता यादी न्यायालयात प्रलंबित असलेल्या विविध खटल्यांच्या निकालांवर अवलंबून आहे. त्यामुळे अंतिम शिफारस करताना न्यायालयीन निर्णयांचाही विचार केला जाणार आहे. यासोबतच, काही उमेदवारांना भरती प्रक्रियेतून बाहेर पडण्याचा पर्यायही देण्यात येणार आहे.
एमपीएससीची महत्त्वाची सूचना
आयोगाने स्पष्ट केले आहे की,PSI 2023 ची अंतिम गुणवत्ता यादी प्रकाशित झाल्यानंतरच उमेदवारांची नियुक्ती प्रक्रिया सुरू होईल. त्यामुळे उमेदवारांनी अधिकृत संकेतस्थळावर नियमितपणे माहिती तपासावी. त्याचबरोबर, ही गुणवत्ता यादी एमपीएससीच्या संकेतस्थळावर उपलब्ध आहे. याठिकाणी उमेदवारांना त्यांच्या गुणांसह संपूर्ण तपशील पाहता येणार आहे.
