हॅलो महाराष्ट्र ऑनलाईन| रोखठोक प्रश्न विचारण्याच्या भूमिकेमुळे देशभरात प्रसिद्ध असलेल्या जेष्ठ पत्रकार रजत शर्मा यांच्यावर काँग्रेस प्रवक्त्या रागिणी नायक (Ragini Nayak) यांनी गंभीर आरोप केले आहेत. ज्यात त्यांनी लाइव्ह डिबेटमध्ये रजत शर्मा (Rajat Sharma) यांनी शिवीगाळ केली असल्याचे म्हटले आहे. त्यामुळेच रजत शर्मा यांना सोशल मीडियावर लोकांकडून ट्रोल केले जात आहे. तसेच, त्यांच्यावर कठोर कारवाई करण्यात यावी अशी मागणी ही काँग्रेसकडून आणि नेटकर्यांकडून केली जात आहे.
नेमके काय घडले??
लोकसभा निवडणुकीच्या काळामध्ये रागिणी नायक यांना लाइव्ह डिबेटमध्ये बोलवण्यात आले होते. परंतु चर्चेदरम्यानच रजत शर्मा यांनी रागिणी नायक यांच्यासोबत गैरवर्तणूक केली. तसेच, “क्या बेह….द है” अशा शब्दात त्यांना शिवीगाळ देखील केली. ही सर्व माहिती स्वतः रागिणी नायक यांनी X वर एक ट्विट करत दिली आहे. यामध्ये त्यांनी त्या लाईव्ह डिबेटचा व्हिडिओ ही जोडला आहे. या व्हिडिओमध्ये, या लोकसभा निवडणुकीत काँग्रेस आणि भाजप किती जागा जिंकेल याबाबत दोघेजण चर्चा करताना दिसत आहेत. परंतु, मध्येच रजत शर्मा यांनी शिवीगाळ केल्याचे व्हिडिओत कैद झाले आहे.
महत्वाचे म्हणजे, या सर्व प्रकरणानंतर रागिणी नायक यांनी ही व्हिडिओ क्लिप सोशल मीडियावर पोस्ट केली आहे. त्यांनी म्हणले आहे की, “पहिला व्हिडिओ X वर माझ्या निदर्शनास आणून देण्यात आला. ज्यात रजत शर्मा मला लाईव्ह डिबेटमध्ये शिवीगाळ करताना दिसत आहेत. त्यामुळे मी या व्हिडिओचे तथ्य तपासले. तसेच, चॅनलवरून या व्हिडिओचे कच्चे फुटेज काढले. यापेक्षा पत्रकारितेची पातळी काय घसरणार? रजत शर्मा यांच्याकडे काही उत्तर आहे का?”
दरम्यान, सोशल मीडियावर रजत शर्मा यांचा हा व्हिडिओ व्हायरल झाल्यानंतर त्यांच्यावर अनेकांकडून टीका केली जात आहे. तर दुसऱ्या बाजूला काही युजर्स रजत शर्मा यांची बाजू घेताना दिसत आहेत. “रजत शर्मा यांचा फेक व्हिडिओ बनवण्यात आला आहे.” असे अनेकांचे म्हणणे आहे. त्यामुळे सध्या हे प्रकरण सोशल मीडियावर चांगलेच चर्चेत आले आहे.