हॅलो महाराष्ट्र ऑनलाईन| सरकारी नोकरीच्या शोधात असणाऱ्या उमेदवारांसाठी एक महत्त्वाची बातमी समोर आली आहे. केंद्रीय लोकसेवा आयोग (UPSC) लवकरच नागरी सेवा परीक्षा (CSE) 2025 चे नोटिफिकेशन जाहीर करणार आहे. इच्छूक उमेदवार यूपीएससीच्या अधिकृत वेबसाइटवर जाऊन परीक्षेची संपूर्ण माहिती, अभ्यासक्रम आणि परीक्षा पॅटर्न पाहू शकतात.
महत्वाचे म्हणजे, यंदा आयोगाने नेहमीपेक्षा जानेवारी महिन्यातच नोटिफिकेशन प्रसिद्ध करण्याचा निर्णय घेतला आहे. यासोबत अर्ज प्रक्रिया देखील लवकरच सुरू करण्यात येणार आहे. मात्र याबाबत अधिकृत घोषणा करण्यात आलेली नाही. मागील वर्षी UPSC CSE साठी 1056 तर भारतीय वन सेवा (IFS) साठी 150 पदांची भरती करण्यात आली होती. आता यावर्षीच्या पदसंख्येबाबत निश्चित माहिती नोटिफिकेशनद्वारे समजणार आहे.
परीक्षा वेळापत्रक
UPSC CSE 2025 ची प्राथमिक परीक्षा 25 मे 2025 रोजी होणार असून, मुख्य परीक्षा 22 ऑगस्ट 2025 पासून पाच दिवस घेतली जाईल. पूर्व परीक्षेत पात्र ठरलेल्या उमेदवारांनाच मुख्य परीक्षेसाठी संधी मिळेल. सध्या यूपीएससी सीएसई 2024 ची मुलाखत प्रक्रिया सुरू असून ती एप्रिलमध्ये संपणार आहे.
अर्ज करण्याची प्रक्रिया
यूपीएससी सीएसई 2025 साठी इच्छुक उमेदवार अधिकृत वेबसाइट upsc.gov.in वर जाऊन ऑनलाइन अर्ज करू शकतात. होमपेजवरील “UPSC CSE 2025” नोंदणी लिंकवर क्लिक करून अर्ज प्रक्रियेची सुरुवात करता येईल. अर्ज भरण्यासाठी वैयक्तिक माहिती भरून आवश्यक कागदपत्रे अपलोड करावी लागतील. शुल्क भरल्यानंतर अर्ज सबमिट करून त्याची प्रिंटआउट काढून भविष्यासाठी जतन करण्याचा सल्ला दिला जातो.
अर्ज शुल्क
महिला, अनुसूचित जाती-जमाती आणि दिव्यांग उमेदवारांना अर्ज शुल्कातून सूट देण्यात आली आहे. तर इतर उमेदवारांसाठी 100 रुपये शुल्क आहे. हे शुल्क ऑनलाइन किंवा एसबीआयच्या शाखेत रोख स्वरूपात भरता येईल.
