हॅलो महाराष्ट्र ऑनलाईन | घरफोडींच्या गुन्ह्यांमध्ये तीन वर्षांपासून वॉन्टेड असलेल्या पुण्यातील आंतरराज्य केटीएम टोळीला सातारा पोलिसांनी जेरबंद केले आहे. या टोळीकडून २७ घरफोडीचे २७ गुन्हे उघडकीस आले असून गुजरातमधील सोनारांकडे गहाण ठेवलेले १०३ तोळे सोन्याचे दागिने आणि ५ किलो चांदी, असा ७० लाखांचा मुद्देमालही हस्तगत केला आहे. याप्रकरणी तीन चोरट्यांसह चोरीचा मुद्देमाल विकत घेणाऱ्या दोन सोनारांनाही अटक करण्यात आली आहे.
घरफोड्या करून धूम स्टाईलने पळून जायचे
सातारा जिल्ह्यातील मेढा, मल्हारपेठ, वाई, सातारा तालुका, बोरगाव, खंडाळा, शिरवळ, भुईंज, वाई, वाठार, उंब्रज, व वडुज भागामध्ये तीन केटीएम मोटरसायकलवरून ६ ते ७ जण यायचे आणि घरफोड्या, चोऱ्या करुन धूम स्टाईलने पळून जायचे. या टोळीला पकडण्याचे आदेश पोलीस अधीक्षक समीर शेख, अपर पोलीस अधीक्षक आँचल दलाल यांनी एलसीबीचे पोलीस निरीक्षक अरुण देवकर यांना दिले होते.
तीन राज्यात चोरी, घरफोडीचे गुन्हे
केटीएम गँगने महाराष्ट्रातील सातारा, पुणे, अहमदनगर, कोल्हापूर, सांगली जिल्ह्यात तसेच कर्नाटक आणि गुजरात राज्यात मोठ्या प्रमाणात घरफोड्या आणि चोऱ्या केल्या आहेत. त्यामुळे या आंतरराज्य टोळीला पकडण्याचे मोठे आव्हान सातारा जिल्हा पोलीस दलासमोर होते. पोलीस निरीक्षक अरुण देवकर यांनी सहाय्यक पोलीस निरीक्षक सुधीर पाटील, रविंद्र भोरे, उपनिरीक्षक विश्वास शिंगाडे, अमित पाटील यांच्या अधिपत्त्याखाली खास तपास पथके तयार केली.
3 महिने टोळीच्या बारीक – सारीक हालचालींवर पाळत
एकाच रात्रीत ८ ते १० बंद घरांमध्ये चोरी करून धूम स्टाईलने ही टोळी पळून जात होती. घरफोडी आणि चोरी करण्याच्या पद्धतीचा पोलिसांनी अभ्यास केला. पोलिसांचा खबऱ्या सलग ३ महिने पुणे, पौड, यवत, मुळशी परिसरात केटीएम टोळीच्या हालचालींवर लक्ष ठेवून सातारा पोलिसांना माहिती देत होता.
घरफोडी करणारी KTM गॅंग जेरबंद; 103 तोळ्याचे दागिने, 5 किलो चांदी हस्तगत
सातारा पोलिसांनी गुजरातमधून मुद्देमाल केला हस्तगत, सोनारांनाही ठोकल्या बेड्या
SP समीर शेख काय म्हणाले? वाचा बातमी, पहा Video 👉 pic.twitter.com/PH1ISuxK86
— Hello Maharashtra (@HelloMaharashtr) November 14, 2023
मुळशी परिसरात तिघांना पकडले
केटीएम गँगमधील ३ जण पौड परिसरात असल्याची माहिती पोलीस निरीक्षक अरुण देवकर यांना मिळाली. त्याप्रमाणे सहाय्यक पोलीस निरीक्षक रमेश गर्जे, रविंद्र भोरे, उपनिरीक्षक विश्वास शिंगाडे, अमित पाटील यांच्या पथकाने पौड (ता. मुळशी, जि. पुणे) येथील डोंगरी भागात सापळा लावून सुरदेव सिलोन नानावत, परदुम सिलोन नानावत (रा. घोटावडे, ता. मुळशी, जि. पुणे) आणि राम धारा बिरावत (रा. करमोळी, ता. मुळशी जि. पुणे) यांना पकडले.
चोरीचा मुद्देमाल गुजरातमध्ये विकला
मार्च २०२२ ते जुलै २०२३ या कालावधीत घरफोड्या करुन सोन्या, चांदीचे दागिणे व रोख रकम चोरल्याची कबुली संशयितांनी दिली. तसेच चोरीचा मुद्देमाल अहमदाबाद (गुजरात) येथील महिला सोनार तसेच सोनपालसिंग नारायणसिंग रजपूत व प्रदीप आसनदास खटवानी यांना विकल्याचे सांगितले. पोलिसांच्या एका पथकाने अहमदाबादला जाऊन महिला सोनार आणि प्रदीप आसनदास खटवानी यांना ताब्यात घेऊन गुन्ह्यात अटक केली.
चोरट्यांना मदत करणाऱ्यास अटक
वामन नंदू राठोड रा. फंडवस्ती रांजनगाव जि.पुणे, व वाल्मीक रामभाऊ शेखावत, रा. पाटस, ता. दौंड, जि. पुणे हे वर नमुद मुख्य आरोपींच्या नेहमी संपर्कात होते. आरोपींना ताब्यात घेतल्यापासून वामन राठोड हा गुजरातला पळून गेला होता. त्यांनाही पोलिसांनी अटक केली आहे. चोरीचा मुद्देमाल आपल्या मदतीने गुजरातमधील सोनारांकडे गहाण ठेवला असल्याची माहिती राठोड याने दिली.
११५ गुन्ह्यांची उकल, ३३८ तोळे सोने हस्तगत
नोव्हेंबर २०२२ पासून आतापर्यंत दरोडा, जबरी चोरी, घरफोडी चोरी, असे एकुण ११५ मालमत्तेचे गुन्हे उघडकीस सातारा जिल्हा पोलिसांनी उघडकीस आणले आहेत. या गुन्ह्यांमध्ये चोरीस गेलेले दागिन्यांपैकी नमुद गुन्ह्यांमध्ये चोरीस गेलेल्या सोन्याच्या दागिण्यांपैकी ३ किलो ३८० ग्रॅम (३३८ तोळे सोने), ४लाख ४४ हजार रुपये किंमतीचे चांदीचे दगिने (६ किलो), असा २ कोटी ६ लाख १८ हजार रुपये किंमतीचा मुद्देमाल हस्तगत करण्यात आलेला आहे.