विधानसभा निवडणुकीसाठीचे उमेदवारी अर्ज दाखल झाल्यानंतरही काँग्रेसला लागलेली गळती थांबलेली नाही. धुळे जिल्ह्यातील शिरपूरचे काँग्रेसचे आमदार अमरिश पटेल हे भाजपात प्रवेश करणार आहे. मुख्यमंत्री देवेंद्र फडणवीस यांची आज (९ ऑक्टोबर) शिरपूरमध्ये सभा होत आहे. या सभेतच ते भाजपात प्रवेश करणार आहे.
पुण्यात मात्र बहुजन मुक्ती पक्षाने वेगळा मार्ग अवलंबत अनुसूचित जातींसाठी राखीव असलेल्या पुणे कँटोनमेंट विधानसभा मतदारसंघातून फोटोग्राफी करणाऱ्या माणसाला उमेदवारी दिली आहे. किशोर बाजीराव तुपारे असं या उमेदवाराचं नाव आहे. तुपारे हे मूळचे अकोला जिल्ह्यातील असून पुण्याच्या महर्षीनगर परिसरातील मीनाताई ठाकरे झोपडपट्टीत राहतात. तुपारे यांचा जन्म १९७७ सालचा. १९९० साली पुण्यात आलेल्या तुपारे यांनी कुटुंबियांच्या पाठिंब्यावर गुलटेकडी, डायस प्लॉट, महर्षीनगर आदी भागात फोटोग्राफीचा व्यवसाय करण्यास सुरुवात केली. आयुष्यात येणाऱ्या चढ-उतारांचा ठामपणे सामना करत त्यांनी अल्पावधीतच व्यवसाय भक्कम केला. सासरे आणि पत्नी यांच्या पाठिंब्यावर त्यांनी व्यवसायात अपेक्षित यश मिळवलं. उच्च शिक्षण घेऊन त्यांनी वकील होण्याचं स्वप्न पाहिलं होतं मात्र बेताच्या परिस्थितीने त्यांचं स्वप्न पूर्ण होऊ शकलं नाही. एवढं असतानाही समाजकारणाची कास त्यांनी सोडली नाही.
तुपारे हे सामाजिक क्षेत्रात सक्रिय असून भारत मुक्ती मोर्चा संघटनेचे कार्याध्यक्ष म्हणून त्यांनी काम पाहिलं
कोथरुडची निवडणूक ही स्थानिक विरुद्ध बाहेरचा अशीच असणार आहे. भाजपचा उमेदवार आजही कोथरूडमध्ये घर घेण्यासाठी धडपडत आहे. अशा परिस्थितीत ज्या माणसाला कोथरुड नक्की काय आहे हेच माहीत नसेल तो इथल्या लोकांमध्ये कसा मिसळणार असा सवाल करत – यंदा कोथरूडमध्ये १०० टक्के परिवर्तन होणार असा विश्वास मनसेचे कोथरुड विधानसभा मतदारसंघातील उमेदवार किशोर शिंदे यांनी व्यक्त केला. हॅलो महाराष्ट्राला दिलेल्या विशेष मुलाखतीत ते बोलत होते.
अंबरनाथ मतदारसंघात राष्ट्रवादी काँग्रेसच्या उमेदवाराने काँग्रेस उमेदवाराला समर्थन जाहीर केल्याने काँग्रेस राष्ट्रवादीत निर्माण झालेला तिढा अखेर सुटला. दोन्ही पक्षाच्या वतीने संयुक्त पत्रकार परिषद घेत या वादावर पडदा टाकण्यात आला.
सत्ता स्थापनेसाठी पुन्हा एकदा मैदानात उतरललेल्या शिवसेना-भाजपा महायुतीला बंडखोरीचा फटका बसण्याची शक्यता आहे. अर्ज मागे घेण्याच्या दिवसापर्यंत बंड शमवण्यात महायुतीला यश आले नाही. काही नेत्यांनी आपली तलवार म्यान केली. मात्र, काही नेत्यांनी बंडाचा झेंडा उचलला. या बंडखोरीमुळे शिवसेना-भाजपाची चांगलीच डोकेदुखी वाढली आहे. महायुतीमधील या बंडखोरीचा आघाडीला तब्बल ३० जागांवर फायदा होण्याची शक्यता वर्तवण्यात येत आहे.
देशाला स्थिर सरकार देण्यासाठी आणि सेनेच्या स्थापनेपासूनचा हिंदुत्वाचा मुद्दा जिवंत ठेवण्यासाठी नरेंद्र मोदी आणि भाजपला पाठिंबा दिला असल्याचं उद्धव ठाकरेंनी स्पष्ट केलं.
‘भाजपच्या आमदारांना सत्तेचा माज आला आहे. विरोधकांना पालापाचोळा व कचरा म्हणणाऱ्या सुरेश खाडेंना मतदारच पालापाचोळ्यासारखे उडवून लावतील. त्यांची सत्तेची मस्तीच मतदारच उतरवतील’ अशी टीका स्वाभिमानी शेतकरी संघटनेचे अध्यक्ष राजू शेट्टी यांनी मिरजेतील पत्रकार परिषदेत केली. यावेेळी विशाल पाटील, जयश्रीताई पाटील, महेश खराडे, संदीप राजोबा, तसेच शेतकरी संघटनेचे कार्यकर्ते मोठ्या संख्येने उपस्थित होते.
सांगली विधानसभा मतदारसंघात भाजपचे बंडखोर शिवाजी उर्फ पप्पू डोंगरे यांनी उमेदवारी अर्ज माघार घेतल्याने काँग्रेसचे पृथ्वीराज पाटील व भाजपचे सुधीर गाडगीळ यांच्यात आता थेट लढत होत आहे. तर दुसरीकडे शिवसेनेचे बंडखोर शेखर माने मैदानात असल्याने भाजपच्या उमेदवाराला फटका बसण्याची शक्यता वर्तविली जात आहे.
मुक्ताईनगर विधानसभा मतदारसंघातून शिवसेनेचे जिल्हाध्यक्ष चंद्रकांत पाटील एकनाथ खडसे यांची कन्या रोहिणी खडसे यांच्या विरोधात उभे आहेत. पाटील यांनी शिवसेनेच्या जिल्हाध्यक्ष पदाचा राजीनामा दिला असून मातोश्रीकडून तो अद्याप स्वीकारल्या गेला नाही आहे. याच कारणावरून एकनाथ खडसे यांनी शिवसेनेच्या भूमिकेबाबत प्रश्न उपस्थित केले असून शिवसेनेला वॉर्निंग दिली आहे.
भाजपा-शिवसेना महायुतीचे खामगाव विधानसभा मतदारसंघाचे उमेदवार आमदार आकाश फुंडकर यांच्या समर्थनार्थ खामगाव येथील श्रीहरी लॉन्स येथे मुस्लिम समाजाचा भव्य मेळावा संपन्न झाला. या मेळाव्याला मुस्लिम सामाजातील अनेकांची उपस्थिती होती. या मेळाव्याला आमदार फुंडकर यांनी संबोधित करत ‘आमदार नव्हे तर कामदार बनून काम करण्याचा माझा संकल्प’ असल्याचे सांगितले.