भारत देशात सुमारे ७०% लोकसंख्या ग्रामीण भागात राहते आणि त्यांचा मुख्य व्यवसाय शेती असतो. देशातील प्रत्येक गावाची आपली एक खास ओळख आणि वैशिष्ट्य असते. सध्या ग्रामीण संस्कृती पाहण्याची ओढ पर्यटकांमध्ये मोठ्या प्रमाणात वाढली आहे. त्यामुळे अनेकजण भारतातील खास, अनोख्या गावांचा शोध घेत असतात. सरकारदेखील ‘व्हिलेज टुरिझम’ला प्रोत्साहन देत असून पर्यटकांना स्थानिक जीवनशैली, अन्नसंस्कृती, पोशाख, भाषा यांचा अनुभव घेण्याची संधी मिळतेय. भारताच्या अशाच खास गावांपैकी एक म्हणजे अरुणाचल प्रदेशमधील डोंग गाव, जिथे देशात सर्वात लवकर सूर्य उगवतो.
पहाटे ३ वाजता सूर्योदय!
भौगोलिक दृष्टिकोनातून भारताच्या पूर्व भागात सर्वात आधी सूर्यकिरणे पडतात. डोंग हे गाव अशा प्रदेशात वसलेलं आहे, जिथे पहाटे ३ ते ४ वाजण्याच्या सुमारासच सूर्य उगवतो. जेव्हा संपूर्ण देशात अजून रात्रीचे वातावरण असते, तेव्हा या गावात उजाडलेलं असतं. याच गावात संध्याकाळदेखील लवकर होते – सुमारे ४ वाजता अंधार पडतो. म्हणूनच अरुणाचल प्रदेशाला “उगवत्या सूर्याची भूमी” असंही म्हटलं जातं.
पर्यटकांचं लक्ष वेधणारं ठिकाण
या अनोख्या निसर्गदृश्यामुळे डोंग गाव हे पर्यटकांचं आवडतं ठिकाण बनत चाललं आहे. इथला शांत, निसर्गरम्य परिसर, स्वच्छ हवा आणि पहाटेच्या सूर्यकिरणांचा नजारा मन मोहून टाकतो. विशेषतः नवीन वर्षाच्या स्वागतासाठी येथे पर्यटकांची संख्या वाढताना दिसते. राज्य सरकारदेखील इथल्या विकासाकडे लक्ष देत असून, पर्यटकांना अधिक चांगल्या सुविधा देण्यासाठी विविध उपाययोजना केल्या जात आहेत.
डोंग गाव का खास?
- भारतात सर्वात आधी इथे सूर्य उगवतो
- निसर्गप्रेमी आणि फोटोग्राफर्ससाठी हे एक आदर्श ठिकाण
- पारंपरिक जीवनशैली आणि स्थानिक संस्कृतीचा अनुभव
डोंग गाव हे भारतातील एक अनोखं रत्न आहे, जे आपल्या नैसर्गिक सौंदर्यामुळे आणि वैशिष्ट्यांमुळे पर्यटकांना खुणावतंय. जर तुम्हीही कधी वेगळा अनुभव घ्यायचा विचार करत असाल, तर डोंग गावाच्या सूर्योदयाची अनुभूती नक्की घ्या!
