WhatsApp ने जानेवारी 2025 महिन्यात भारतात 99 लाखाहून अधिक अकाउंट्स बॅन केल्याची माहिती समोर आली आहे. हे अकाउंट्स स्पॅम, फसवणूक आणि अवांछित मेसेजिंगसारख्या धोरणांच्या उल्लंघनामुळे बॅन करण्यात आले आहेत. विशेष म्हणजे, यापैकी 13.27 लाख अकाउंट्स अशा होत्या ज्या कोणत्याही वापरकर्त्याने तक्रार करण्याआधीच प्रोअ‍ॅक्टिव्हली बॅन करण्यात आल्या.
WhatsApp ला मिळालेल्या तक्रारींची स्थिती
WhatsApp ला भारतातील युजर्सकडून 9,474 तक्रारी मिळाल्या होत्या. त्यामध्ये विविध समस्यांचा समावेश होता. मात्र, यातील केवळ 239 अकाउंट्सवर कारवाई करण्यात आली. यामध्ये सर्वाधिक तक्रारी ‘बॅन अपील्स’ (4,212) या स्वरूपात होत्या, ज्यामध्ये 111 अकाउंट्सना रिव्ह्यू करून परत सुरू करण्यात आले.
WhatsApp ने कोणत्या कारणांमुळे अकाउंट्स बॅन केली?
WhatsApp ने IT नियम 2021 अंतर्गत नियमांचे उल्लंघन करणाऱ्या अकाउंट्सवर ही कारवाई केली आहे. यामध्ये प्रमुख कारणे पुढीलप्रमाणे आहेत –
अनावश्यक किंवा बल्क मेसेजिंग : मोठ्या प्रमाणावर जाहिराती, प्रमोशनल मेसेज किंवा अकारण मेसेज पाठवल्यास अकाउंट बॅन होऊ शकते.
अनधिकृत संपर्क माहिती शेअर करणे : परवानगीशिवाय कोणाच्या फोन नंबर किंवा वैयक्तिक माहितीचा गैरवापर केल्यास कारवाई केली जाते.
ब्रॉडकास्ट लिस्टचा गैरवापर : सतत मोठ्या गटाला एकसारखे मेसेज पाठवल्यास ते स्पॅम मानले जाते आणि अकाउंट बॅन होऊ शकते.
फसवणूक किंवा चुकीची माहिती : बनावट माहिती पसरवणे, दिशाभूल करणारे मेसेज पाठवणे किंवा कोणालाही फसवणूक करण्याचा प्रयत्न केल्यास अकाउंटवर बंदी येऊ शकते.
तिरस्कार पसरवणारी किंवा बेकायदेशीर सामग्री : अश्लीलता, हिंसा किंवा कोणत्याही बेकायदेशीर गोष्टींचे प्रसारण केल्यास तुमचे अकाउंट कायमस्वरूपी बंद होऊ शकते.
WhatsApp अकाउंट बॅन होण्यापासून कसे वाचावे?
फक्त ओळखीच्या लोकांनाच मेसेज करा. अनावश्यक लोकांना अकारण मेसेज पाठवू नका.ग्रुपमध्ये कोणालाही जोडण्यापूर्वी त्यांची संमती घ्या. कोणालाही परवानगीशिवाय ग्रुपमध्ये सामील केल्यास तक्रारी होऊ शकतात.फॉरवर्ड केलेल्या मेसेजबाबत सावधगिरी बाळगा. केवळ सत्यापित माहितीच फॉरवर्ड करा. अफवा किंवा दिशाभूल करणारी माहिती पसरवणे टाळा.WhatsApp च्या नियमांचे पालन करा. WhatsApp च्या टर्म्स ऑफ सर्व्हिसचे पालन करणे आवश्यक आहे.
तुमचे अकाउंट कायमस्वरूपी बॅन होऊ शकते
जर तुमच्या अकाउंटवर वारंवार तक्रारी मिळाल्या किंवा नियमांचे उल्लंघन आढळले, तर WhatsApp तुमचे अकाउंट कायमस्वरूपी बंद करू शकते. त्यामुळे सतर्क राहा, जबाबदारीने WhatsApp चा वापर करा आणि सुरक्षितपणे संवाद साधा.
