नागपूर : नानार प्रकल्पग्रस्तांचे आज नागपूरमध्ये आंदोलन आहे. प्रकल्प येण्याने होणारी भीषणता आणि पर्यावरणाच्या हाणीकडे सरकार दुर्लक्ष करत असल्याचा आरोप प्रकल्पग्रस्त करत आहेत. कोकणवासीयांच्या आरोग्याशी खेळ खेळला जात आहे आणि या खेळाला आमचा विरोध आहे असे प्रकल्पग्रस्तांचे म्हणणे आहे.
आज दुपारी बाराच्या सुमारास २०० प्रकल्पग्रस्त नागपूरच्या यशवंत स्टेडियम वर जमणार असल्याची माहीती आहे. नानार प्रकल्पाविरोधात ते नागपूरात आंदोलन करणार आहेत. या प्रकल्पग्रस्तांनी विधानभवनावर मोर्चा काढण्यासाठी परवानगी मागितली होती परंतु सुरक्षेचे कारण देत त्यांना पोलीस प्रशासनाने परवानगी नाकारली. प्रकल्पग्रस्त दोन वाजण्याच्या सुमारास पत्रकार परिषद घेणार आहेत. तसेच त्यांनी मुख्यमंत्र्यांना भेटण्याची ही इच्छा व्यक्त केली आहे.
दरम्यान काल विधानसभेत नानार प्रकल्पा संदर्भात लक्षवेधी सूचना मांडण्यात आली होती. यावर मुख्यमंत्र्यांनी सरकारची बाजू मांडली. आज विधान परिषदेत उदयोग मंत्री सुभाष देसाई नानार संदर्भात निवेदन मांडणार आहेत.
