चंद्रपूर । सतिश शिंदे
ब्रम्हपूरी तालुक्यातील खंडाळा येथील रहिवासी अशोक केवळराम मेश्राम यांचा २ वर्षाचा मुलगा युग याची २२ ऑगस्ट २०१८ रोजी जादूटोणा व गुप्तधन मिळवण्याच्या अंधश्रध्देतून निर्दयी व अमानुषपणे गळा दाबून हत्या करण्यात आली होती. त्या खंडाळा गावाला केंद्रीय सामाजिक न्याय व सशक्तीकरण राज्यमंत्री रामदास आठवले यांनी दिनांक १ नोव्हेंबर रोजी सकाळी १०.४५ वाजता मुलाचे वडील अशोक मेश्राम व त्यांचे कुटुंबीयांची घरी जाऊन भेट घेतली.
यावेळी श्री.आठवले यांनी अनुसूचित जाती, जमाती (अत्याचार प्रतिबंध) कायदा १९८९ अंतर्गत नुकसानभरपाई म्हणून मंजूर करण्यात आलेले ४ लक्ष १२ हजार ५०० रुपयाचा अर्थसहाय्याचा धनादेश युगचे वडील अशोक मेश्राम यांना सुपूर्द करुन त्यांचे व कुटुंबीयांचे सांत्वन केले. ही घटना माणुसकीला काळिमा फासणाऱ्या व अत्यंत निंदणीय असलेल्या या हत्या प्रकरणाचा रामदास आठवले यांनी अत्यंत कठोर शब्दात निषेध केला. यावेळी माजी आमदार अतुल देशकर, समाज कल्याण सहायक आयुक्त प्रसाद कुळकर्णी व इतर कार्यकर्ते उपस्थित होते.