कराड तालुक्यात ११ वर्षाचा मुलगा कोरोना पोझिटिव्ह, जिल्ह्यातील रुग्णसंख्या ४३ वर

कराड प्रतिनिधी | सकलेन मुलाणी

कराड तालुक्यात कोरोना रुग्णांच्या संख्येत दिवसेंदिवस वाढ होत आहे. आज तालुक्यातील एका ११ वर्षांच्या मुलाचा कोरोना अहवाल पोझिटिव्ह आल्याने एकच खळबळ उडाली आहे. क्रांतिसिंह नाना पाटील सर्वसाधारण रुग्णालय, सातारा येथील एक 36 वर्षीय महिला आरोग्य कर्मचारी व वेणूताई चव्हाण उपजिल्हा रुग्णालय, कराड येथील बाधित रुग्णाच्या निकट सहवासित 11 वर्षाचा मुलगा असे एकूण 2 जणं पॉझिटिव्ह (कोविड-19) बाधित असल्याचे बी.जे. वैद्यकीय महाविद्यालय, पुणे यांनी कळविले आहे, अशी माहिती जिल्हा शल्यचिकित्सक डॉ. आमोद गडीकर यांनी दिली आहे.

सदर ११ वर्षांचा मुलगा कराड तालुक्यातील कापिल गावचा रहिवासी असल्याची माहिती समोर येत आहे. प्रशासनाकडून सदर मुलाच्या संपर्कात आलेल्यांचा शोध घेतला जात आहे. ताज्या आकडेवारीनुसार सातारा जिल्ह्यातील कोरोना रुग्णांची संख्या आता ४३ वर पोहोचली आहे. यामध्ये सर्वाधिक रुग्ण कराड तालुक्यात असून कराड तालुक्यातील एकुण रुग्णसंख्या 31 वर पोहोचली आहे. आता सातारा जिल्ह्यात 33 रुग्ण कोविड बाधित असून आता पर्यंत 8 (कोविड 19) मुक्त होऊन रुग्णालयातून सोडले आहेत तर 2 जणांचा मृत्यू झाला आहे.

तसेच आज दि. 29 एप्रिल रोजी क्रांतिसिंह नाना पाटील सर्वसाधारण रुग्णालय, सातारा येथे 34, वेणूताई चव्हाण उपजिल्हा रुग्णालय, कराड येथे 18, ग्रामीण रुग्णालय कोरेगाव येथे 11 असे एकूण 63 जणांना विलगीकरण कक्षात दाखल करण्यात आले आहे. या सर्वांच्या घशातील स्त्रावांचे नमुने बी. जे. वैद्यकीय महाविद्यालय, पुणे येथे तपासणीसाठी पाठविण्यात आले आहेत, अशी माहितीही डॉ. गडीकर यांनी दिली आहे.