मुंबई : हॅलो महाराष्ट्र – काही दिवसांपूर्वी कोरोना प्रतिबंधक लस घेतल्यामुळे घाटकोपरमधील एका 15 वर्षीय अल्पवयीन मुलीचा मृत्यू झाल्याची खळबळजनक घटना उघडकीस आली होती. हि बातमी समाजमाध्यमांमध्ये व्हायरल झाल्यानंतर पालकांमध्ये भीतीचं वातावरण निर्माण झालं होतं. मात्र संबंधित मुलीचा मृत्यू लसीकरणामुळे झाला नसल्याचा दावा महानगर पालिकेकडून करण्यात आला आहे.
काय आहे नेमके प्रकरण ?
घाटकोपरमधील रहिवासी असणाऱ्या 15 वर्षीय आर्याने 8 जानेवारी रोजी राजावाडी रुग्णालयात कोरोना प्रतिबंधक लस घेतली होती. यानंतर 12 जानेवारी तिचा अचानक मृत्यू झाला होता. यानंतर या मुलीचा मृत्यू लसीकरणामुळे झाल्याचा मजकूर तिच्या फोटोसह सोशल मीडियावर टाकण्यात आला होता. यानंतर पालिकेने संबंधित व्यक्तीकडे लसीकरणामुळे मृत्यू झाल्याचे पुरावे मागितले. पण त्याच्याकडे या गोष्टीचा एकही पुरावा नव्हता.
या घटनेनंतर मुंबईच्या महापौर किशोरी पेडणेकर यांनी शनिवारी मृत मुलीच्या कुटुंबीयांची भेट घेऊन त्यांचे सांत्वन केले. मृत आर्याच्या आजोबांच्या मते लसीकरणामुळे तिचा मृत्यू झालेला नाही. तिने अभ्यासाचा अतिताण घेतला होता. हा ताण असह्य झाल्याने हृदयविकाराचा झटका येऊन तिचा मृत्यू झाला आहे. असे त्यांनी सांगितले. त्यामुळे या दु:खद प्रसंगी कोणीही याचं राजकारण करू नये असे आवाहन महापौर किशोरी पेडणेकर यांनी केले आहे.