हॅलो महाराष्ट्र ऑनलाईन| मे महिन्याच्या सुट्ट्या संपत आल्यामुळे गावी गेलेले कोकणकर पुन्हा कामासाठी शहरात परतत आहेत. अशा चाकरमान्यांसाठी एक महत्त्वाची बातमी समोर आली आहे. कोकण रेल्वेवर मध्य रेल्वेकडून येत्या 31 मे रोजी मेगाब्लॉक घेण्यात येणार आहे. त्यामुळे रेल्वे गाड्यांच्या वेळापत्रकामध्ये बदल करण्यात येणार आहे. ज्याचा प्रवाशांवर मोठा परिणाम होईल. तसेच, शहरात परतणाऱ्या प्रवाशांचे हाल ही होऊ शकतात.
सध्या पायाभूत कामांसाठी मध्य रेल्वेवरील सीएसएमटी येथे मेगाब्लॉक सुरू आहे. त्याचबरोबर आता, कोकण रेल्वेच्या रत्नागिरी ते वैभववाडी मार्गावर 31 मे रोजी मेगा ब्लॉक असणार आहे. रत्नागिरी- वैभववाडी सुरू असलेल्या देखभाल आणि दुरुस्तीच्या कामासाठी 31 मे रोजी सकाळी 9.10 ते सकाळी 11.40 वाजेपर्यंत ब्लॉक असणार आहे. त्यामुळे अनेक रेल्वेगाड्यांचे वेळापत्रक कोलमडणार आहे.
या मेगाब्लॉकमुळे गाडी क्रमांक १०१०६ सावंतवाडी रोड ते दिवा एक्स्प्रेस सावंतवाडी रोड ते वैभववाडी रोडदरम्यान 80 मिनिटे थांबा घेतला जाईल. यासह गाडी क्रमांक १२०५१ सीएसएमटी -मडगाव जनशताब्दी एक्स्प्रेस चिपळूण ते रत्नागिरी दरम्यान 40 मिनिटे थांबा घेईल. पुढे गाडी क्रमांक २२११९ सीएसएमटी ते मडगाव तेजस एक्स्प्रेस रत्नागिरी दरम्यान 20 मिनिटे थांबा घेईल. या मेगा ब्लॉकमुळे डाऊन मंगला लक्षद्वीप एक्स्प्रेससह मुंबईकडे येणाऱ्या अप रेल्वे गाड्यांच्या ही वेळापत्रकात बदल होईल.