मुंबई । मुंबईत कोरोना रुग्णांची वाढती संख्या असलेल्या भागात मुंबई महानगरपालिकेनं कंटेन्मेंट झोन म्हणून जाहीर केले आहेत. सध्याच्या घडीला मुंबईतील २४ विभागांत एकूण ७९८ कंटेन्मेंट झोन आहेत. यात १८९५७ करोना रुग्ण आढळले आहेत. तर या झोनमधील ४५८८ इमारतींना सील करण्यात आलं आहे. महापालिकेनं जाहीर केलेल्या आकडीवारीनुसार, या ७९८ कंटेन्मेंट झोनमध्ये ४२ लाख लोकं राहतात. तर, पालिकेनं सील केलेल्या इमारतींमध्ये ८ लाखांहून अधिक लोक राहतात. या आकडेवारीनुसार, १.२५ कोटी लोकसंख्या असलेल्या मुंबईत जवळपास ५० लाख लोकं कंटेन्मेंट झोन व सील केलेल्या घरात राहत आहेत.
मुंबईतील कंटेन्मेंट झोन
एम पूर्व व आर- उत्तर विभागात १००हून अधिक कंटेन्मेंट झोन आहेत. एम पूर्व विभागात ११५ कंटेन्मेंट झोन असून तिथे १०२१ करोना रुग्ण आहेत. तर, आर- उत्तर विभागात ११६ कंटेन्मेट झोन आहेत तिथे करोनाचे ३३२ रग्णांची नोंद झाली आहे. सगळ्यात अधिक कंटेन्मेंट झोन ९ डी या विभागात आहेत. तिथे १९१ रुग्ण आहेत. तर, सी विभाग टी विभाग १०-१० कंटेन्मेंट झोन आहेत.
मुंबई प्रशासनाने कंबर कसली
मुंबईत करोना रुग्णांची संख्या वाढतीच आहे. कोरोना रुग्णांच्या संख्येत मुंबईनं चीनलाही मागे टाकलं आहे. शहरात आता ५० हजारांच्यावर कोरोनाचे रुग्ण आहेत. मुंबईत कोरोनाचा प्रसार रोखण्यासाठी महानगरपालिका आणि प्रशासनाने कंबर कसली आहे. शहरात सध्या २९ हजार ऍक्टिव रुग्ण आहेत. यातील ६५ टक्के रुग्ण हे झोपडपट्टी व चाळीतील आहे. झोपडपट्टी व चाळीत कोरोनाचा प्रसार थांबवणे हे महानगरपालिकेसमोर आव्हान आहे. पालिकेनं तिथं फिव्हर क्लिनिक सुरू केल्यामुळं जास्तीत जास्त कोरोनाच्या टेस्ट केल्या जात आहेत.