नवी दिल्ली । लॉकडाऊनमुळे परदेशात अडकलेले अनेक भारतीय ‘एअर इंडिया’ची विमान मायदेशी पोहचत आहेत. अशा वेळी एअर इंडियानं देशांतर्गत सेवा सुरू करणार असल्याचं म्हटलं आहे. एअर इंडिया १९ मे ते २ जून दरम्यान विशेष देशांतर्गत विमान सेवा (डोमेस्टिक फ्लाईट) सुरू करणार आहे. यातील बहुतांश विमानं ही दिल्ली, मुंबई, हैदराबाद आणि बंगळुरूहून उड्डाण घेतील. एअर इंडियाच्या अधिकाऱ्यांनी दिलेल्या माहितीनुसार, या विमानांच्या उड्डाणांसाठी वेळापत्रकही तयार करण्यात आलं आहे. आता, केवळ नागरी उड्डाण मंत्रालयाकडून अधिकृतरित्या परवानगी मिळणं बाकी आहे.
एअर इंडियानं आखलेल्या नियोजनानुसार मुंबईहून विशाखापट्टणम, कोचीन, अहमदाबाद, बंगळुरू, हैदराबाद आणि विजयवाडासाठी विशेष विमान असेल. दिल्लीहून असणारी विमानं जयपूर, बंगळुरू, हैदराबाद, कोचीन, अहमदाबाद, विजयवाडा, गया, लखनऊ आणि इतर शहरांसाठी असतील. याशिवाय हैदराबाद ते मुंबई, दिल्ली तसंच बंगळुरू ते मुंबईसाठीही विमान असेल. दिल्ली ते हैदराबादसाठीही विमानसेवा एअर इंडियाकडून पुरवण्यात येणार आहे. याशिवाय भुवनेश्वरहूनन एक विमान बंगळुरूलाही उतरेल. दिल्लीसाठी १७३, मुंबईसाठी ४०, हैदराबादसाठी २५, कोचीनसाठी १२ तर चेन्नईसाठी एक विमान असणार आहे.
यातील बहुतेक विमानांची वेळ परदेशातून भारतात परतणाऱ्या नागरिकांच्या सुविधेसाठी असेल. परदेशातून मायदेशात दाखल होणाऱ्या नागरिकांना आपल्या राज्यात पोहचण्यासाठी या उड्डाणांचा वापर करता येईल. विमानात सोशल डिस्टन्सिंगचे नियमही पाळावे लागतील. नोटिफिकेशन जारी करण्यात आल्यानंतर या विशेष देशांतर्गत विमानांसाठी एअरलाईनच्या वेबसाईटवरून तिकीट बुकींग करावं लागेल. ‘एअरपोर्टस अथॉरिटी ऑफ इंडिया’च्या एका वरिष्ठ अधिकाऱ्यांनी दिलेल्या माहितीनुसार, डोमेस्टिक फ्लाईटस सुरू करण्याची तयारी सुरू आहे. कारण, लवकरच खासगी विमान कंपन्यांना देशांतर्गत सेवा सुरू करण्याची परवानगी मिळू शकते.
”ब्रेकिंग बातम्या मोबाईलवर मिळवण्यासाठी आम्हाला 7972630753 या नंबरला WhatsApp करा आणि लिहा “Hello News.”